EDITORYAL — Bayani sa buhat

Kagahapong adlawa, Agosto 25,2025  gisaulog nato ang atong National Heroes Day agi og pag-ila sa mga bayaning Pilipino kaniadto ug sa modernong panahon. Makiangayon lamang nga ilhon sab nato ang mga bayanihong gibuhat sa atong mga kababayan karong modernong panahon.

Ang pagka-bayani dili masukod pinaagi sa pagsakripisyo sa kinabuhi diha sa panggubatan. Ang pagka-bayani nagsugod diha palang mismo sa mga tagsa-tagsa ka panimalay, sa mga pamilya, sa katilingban, sa trabaho, ug sa kaakohan ngadto sa nasud.

Bayanihon ang buhat sa matag miyembro sa pamilya ilabi na sa mga ginikanan nga misakripisyo og dako para sa ilang mga anak.

Bisan unsa pay trabaho sa mga ginikanan kun para kini sa ilang mga anak, matawag kini nga sakripisyo sa ilang bahin ug kini maisip nga bayanihon nga buhat kay para kini sa kaayohan sa ilang pamilya.

Ang mga mag-uuma, mananagat, construction workers, mga naa sa pribadong kompanya nagtrabaho, overseas Filipino workers, kawani sa gobiyerno, basurero, siyentipiko, kapolisan, sundalo, mga doktor ug medical personnel, mga magtutudlo, enhinyero, drayber,  bombero, ug daghan pang uban, pulos silang tanan mga bayani sa modernong panahon.

Sa mata sa mga kabataan sa pagkakaron, dili pa sila makasabot aning butanga. Ang ilang pagtuo ang mga bayani kadtong lamang mga nasudnong bayani nga gitudlo kanila sa ilang mga magtutudlo.

Bisan sila, isip mga kabataan makonsiderar gihapon nga mga bayani pinaagi sa pagtuon ug pagbuhat sa tanan aron ma-edukar ug makat-on; pagtahod sa ilang mga ginikanan, katiguwangan ug otoridad; ug labaw sa tanan ang pagmahal sa nasud, kultura ug tradisyon sa mga Pilipino.

Ang pagkabayani dili makita tungod sa kolor sa panit, tungod sa gipangbatbat sa baba, kondili pinaagi sa mga buhat, mga buhat nga tinuoray nga dunay pagmahal sa nasud apil ang soberiniya ug teritoryo niini.