"No regret!”

Daling gikuninitan sa online ang video nga gi upload mismo ni Dumanjug Mayor Guntrano Gungun Gica diin gidapatan niya ang lalaki nga niadto sa iyang balay kauban ang kapuyong babaye aron limpyohan kuno ang ilang ngalan sa sala nga ilang nahimo nga pagpahimulos sa kahuyang sa bata nga makapaulbo gyud sa kaspa. Laliman mo na nga apil ang wala pay usa ka tuig nga gibaboy nila physical man o online pornography.

Bisan kinsa naman seguro makahibawo sa gibuhat niining mga tampalasan mag alintabo gyud ang kasuko nga mao usay gibati sa mayor sa Dumanjug niadtong higayona kinsa nasayod na kong giunsa sa magpartner ang bata busa nadapatan gyud.

Reaksiyon sa mga tawo kasagaran gyud nangasuko dili sa mayor kon dili sa magpartner tungod sa dautang binuhatan niini. Gikondenar sila, gani ang uban gusto silang panitan tungod sa kalagot.

Ang viral video nakaabot sa attention sa Commisssion on Human Rights kon CHR kinsa mopahigayon kubo og imbistigasyon.

Sa akong pakighinabi ni Mayor Gica, gipadayag niya nga wala siya magbasol sa iyang gihimo ug andam niyang atubangon ang imbistigasyon sa CHR kay igo ra man pud kuno naghimo sa ilang trabaho ang CHR ug andam siyang magpasilot kong pahamtangan man ugaling.

Giangkon sa mayor nga nadala siya sa iyang emotion niadtong tungora ilabi na nga bata ang biktima kinsa gihatagan og espesyal nga pagtutok sa LGU ang kaso sa pagpangabuso ilabi na sa mga bata. Andam niyang buhaton ang tanan kuno basta lang masumpo ang pagpangabuso ug masilotan ang mga nalambigit.

Sa bahin sa CHR mandato man nila nga panalipdan ang tawhanong katungod sa matag usa apil na kining mga gitumbok o suspek sa paghimo og krimen ilabi na kadtong wala pa masentensyahi sa sala nga nahimo. Ang suspek o akusado giisip pa nga inosente hangtud mahukman sa korte nga sad-an.

Gawas pa trabaho sa CHR ang pagsusi sa mga opisyal sa kagamhanan nga nalambigit sa paghimo sa butang nga nakalapas sa tawhanong katungod.

Bisan unsa ang katulong gibating kalagot dili mahimo nga kumkumon nato ang balaod ug kita na ang mokab-ot og hustisya aron madali ra kay sa iagi pa og due process nga dugay kaayo. Wala kitay mahimo kon dili ang pagsunod sa balaod. Moingon ang uban unya wala nalay kwenta ang gihimo niining mga tampalasan nga mas gilabanan man hinuon.

Bitaw kong pwede pa lang kita ang mosentensiya sa mga tawong makasasala sayon ra gyud unta kaayong pangpitlokon ang mga makasasala. Pero kong ipatigbabaw nato ang kasuko, wala na tay kalainan sa tawo nga atong gikasilagan.

Nabilanggo na ang magkapuyo busa atangan nalang nato kong makonbikto sila o dili. Ang ilang pagkabilanggo mas sakit nga silot kay sa matag adlaw sa ilang kinabuhi hamokon sila sa ilang konsensiya sa nahimo nila sa kaugalingon nilang dugo.

Para nako bahalag gibastrok to sa mayor ang lalaki wala lang unta niya ipakita sa publiko kay mamahimo kining dautan nga sumbanan alang sa uban.