Dili paigo ang pagpangangkon

Bation usab nato ang kasikat labina kun makaduol, makasinati ug makatagbo kita sa tawo usab nga sikat.

Usahay gani, dili ikalimod nga mohimo kita og name dropping sa mga tawo nga sikat aron kapamatud-an ang atong kalambigitan.

Apan dili pa kini paigo. Kun sa tawo dili pa kini paigo unsa pa kaha kun sa Ginoo na mismo? Dili paigo nga moingon kita nga nakaila o nituo kita kaniya.

Hinunoa, atong pangutan-on ang atong kaugalingon kun nituman ba kita mismo sa iyang pagtulon-an diha sa atong inadlaw nga pagkinabuhi.

Basin baya nga sa katapusang mga adlaw kita pagahukman gumikan sa atong kapakyas sa pagtuman ug sa pagpakabuhi sa dakong balaod sa paghigugma nga angayang ipadayag diha sa atong paghigugma sa Dios labaw sa tanan ug sa paghigugma sa atong isigkaingon sama sa paghigugma nato sa atong kaugalingon.

Dugang pa, dili kini mahitungod sa gidugayon sa atong pagpangangkon kondili mahitungod kini sa pagkamatinud-anon bisan gani diha sa kamubo sa panahon.

Husto gayud ang giingon nga ang naulahi mahiuna ug ang mahiuna maulahi.

Bisan pa man kun langay ug hinay ang paglambo sa kinabuhing espirituhanon, ang mahinungdanon nga kita malahutayon.