Katam-is natagamtam sa Isla Camotes

Namungingig makaiibog nga pagdayeg ang gitanom-tisok nga Medical Mission (Agosto 7-8, 2025) didto sa Isla Camotes ni Cebu Governor Pamela ‘Pam’ S. Baricuatro gikan sa katawhang nakailag good governance (walay labot sa mga paid social media trolls, kinsa wala makailag maayong binuhatan sa usa ka buotang mangangalagad sa publiko kay mao ray ilang trabaho ang paghugawhugaw sa matahom niining imahe).

Panahon sa kampanya ni kanhi flight attendant Pam sa miaging 2025 midterm election, mora’g manago taga Camotes, maihap ra intawon sa mga tudlo ang makighimamat.

Busa, pilde gyod siya. Apan dihang siya gyoy gipili sa kinabag-an ug maoy midaog pagka-gobernadador sa Sugbo, unsay nahitabo?

Ang Isla Camotes maoy una niyang gipatilaw sa 456th Cebu Provincial Founding Anniversary Medical Mission, diin sa wala damha, gidumog siya sa bagang duot sa katawhan, timaan nga ‘very welcome’ diay siya sa maong lungsod.

Matod pa sa nakasaksi, hasta close-in guarsd sa gobernador, gipamalid sa nagbahang lumolupyo, nga maoy nakapapuno dayon sa basketball court, diin didto ipahigayon ang paghimamatay ni Gov. Pam ug sa taga Camotes. Nahimong emosiyonal ang maong panagtagbo.

Sa pagdiskurso ni Gov. Pam, iyang gipadayag ang dili matukib sa kalipay niyang gibati niadtong tungora. Sanglit, nahinumdoman niya nga sa una nilang pag-anhi aron mangampanya, pipila ra ka pudyot ang miabi-abi kanila. Pero karon? Mora siyag asukar nga gidugok sa bagang panon sa hulmigas. Gani, may makita pang nanagsul-ob og sininang may nakaimprintang hulagway ni Gov. Pam. Nga nakatandog niya pag-ayo.

Nagmalampuson ang maong kalihokan. Ang Ramon Maningo Memorial Hospital sa San Francisco pang-ayohon ang unsay angay ayohonon, unya hatagan pag doktor nga mahimong makaoperag tabangonong pasyente. Ang Esperanza Elementary School, diin mga pasilidad nadaot, panindoton.

Ang Luciano B. Rama Memorial High School kon unsay mga kulang, hatagan sab og sulbad.

Ug ang kinalamiang bahin agig panapos sa naasoyng programa, mao ang makabuhong nga salosalong gisaw-an sa tanang nanambong uban ni Gov. Pam, mga doktor, frontliners ug mga opisyales sa gobiyerno. Nga dinuyogan sa genuine nga pagminahalay.

Pagkamabulokon nga honeymoon!  Kay sa unang higayon, natagamtaman ni Gov. Pam ug mga lumolupyo sa Camotes ang tiunayng katam-is nga gihungit sa inahan ngadto sa iyang mga anak.