Paglahutay sa politika

Girelyibohan ug gibutang sa floating status ang mga opisyales sa DPWH engineering office sa Bulacan gumikan sa isyu sa mga ghost flood control projects sa maong engineering district.  Nahimong frontline ang mga enhinyero niining pagtuki sa mga ghost flood control projects.  Apan ang mga politiko nga maoy matuod nga utok sa kurapsyon, anaa ra nagpahipi sa luyo ug gihimo’ng salimbong ang makaloluoy nga mga engineers.  Alang sa mga politiko, “Ang pagsalimbong sa ilang kaugalingon batok sa pasangil sa kurapsyon dili lang alang sa ilang kaharuhay kon dili pamaagi sa paglahutay taliwala usa ka matang sa politikanhong gubat.”  Fezteleern!

 “Suwa-an ba’y humay!”

Nabatyagan sa Department of Agriculture nga mas mipabor sa imported nga bugas ang mga Pinoy ug buot masayod ang ahensya sa hinungdan niini.  Gituohan nga mas prayoridad sa katawhan ang kalidad kay sa gidaghanon.  Lupig gyud kita sa laing nasud sa natad sa agrikultura base sa kalidad sa mga produkto.   Makapahinumdum sa Bol-anon nga miagda’g paniudto sa iyang bisita nga Cebuano.  Pulos kan-on’g humay ra ang gidulot, busa nangutana ang Cebuano kon wala ba diay sud-an.  Kay imported man nga bugas ang gidalit sa Bol-anon, masaligon nga kini’ng mitubag nga, “Suwa-an ba’y humay!”  Atala lagee!

 Sukol bisan naghilak

Miluwat og kamanduan si AFP Chief Romeo Brawner, Jr., ngadto sa mga tropa nga nagbantay sa Ayungin Shoal nga pakgangon gayod nila sa bisan unsang paagi, ang bisan kinsa nga mga Chinese nga mosakay o mosampa sa BRP Sierra Madre.  Dalaygon ang pamahayag ni Brawner apan naglibog ang akong kutaw kon unsaon kaha pagpakgang sa atong kasundalohan ang mga Tsino kon ugaling mopugos gyud sila.  Ni’ng kahimtanga, duha ra gayod ang mahimo kon mahitabo ang gikahadlokan: “Mosukol bisan naghilak, o ba kaha, mangayo’g tabang ni Uncle Sam.”  Fezteleern!

 Wala’y molabaw pa

Nastranded tungod sa baha ang pundok sa mga pangulo sa simbahan nga buot unta mohimo og prayer rally atubangan sa Senado agi’g pagprotesta sa mga anomaliya nga nahimo sa pagpatuman sa mga flood control projects.  Mas angayan tingale nga atimanon sa mga pangulo sa simbahan ang kakulang na sa moralidad ug values sa katawhan nga maingon nato nga dakong hinungdan sa kuyanap nga kurapsyon sa nasud.  Komento pa sa akong amigo, “Ang ilang pagka-stranded sa baha daw mensahe kanila sa kinaiyahan nga wala na’y molabaw pa nga matang sa protesta kon itandi sa nahitabo nga mga pagbaha.”  Muleeng!

 Sulayi pagpalta

Mo-implementar og bag-ong disconnection policy and Metro Cebu Water District (MCWD) sugod karong Oktobre 1, 2025 diin hatagan na lang og usa ka bulan nga palugit ang konsumidor, inay sa naandan’g duha ka bulan, apan giluwayan usab ang grace period sa pagbayad gikan sa 3 ngadto sa 7 ka adlaw.  Bisan sa bag-ong polisiya, nagpabilin ang kamatuoran nga bayronon gihapon kini sa konsumidor.  Matud pa bitaw sa pagya-komedya, “Kon nagtoo ka nga nahikalimtan ka na sa katilingban, sulayi pagpalta bisan kausa lang sa imong mga bayronon.”  Pagkatoytoy!