EDITORYAL - Gisaligan gihapon

Ang ka moderno na karon sa teknolohiya ug kapaspas na sa internet basta naa lang cellphone ug load, dali na kaayo ang pagkuha og mga impormasyon.

Apan tungod sab niini, daghan na sab kaayo karon ang makapadudang mga impormasyon tungod sa pagkatap sa mga fake news, artificial intelligence, misinformation ug disinformation.

Ang uban nga wala pa makasuway og gamit ani nga teknolohiya, dili nalang sab ganahan mosuway kay nabalaka silang malibog na hinuon kun unsay tinuod ug kun unsay dili.

Sa pagsaulog karon sa Banat News sa ika-31 niini nga kasumaran, naa kini taliwala sa nagbanggang tinubdan sa mga impormasyon. Ang internet pinaagi sa social media usa sa nahimong dakong hagit niini.

Sa sinugdanan, daghan ang nagtuong mamatay ra og iya o mawagtang na gyud ang tradisyonal nga pamantalaan sama sa Banat News tungod aning internet ug social media.

Apan dili kini maoy nahitabo, inay nga mohinay nikusog naman hinuon ug mas milanog pa tungod kay ang dili maabot sa kopya sa pamantalaan, maabot naman pinaagi sa internet ug social media.

Ang tumong ug misyon nga maghatud og mga husto ug kasaligang mga impormasyon ngadto sa publiko nagpadayon dili lamang pinaagi sa papel kondili hasta napud sa internet.

Apan kay ang social media mas dali man para sa tanan kun naay gikuptang cellphone, nahimo kining kakompetinsya sa mga pamantalaan.

Ang dili lang gyud malabwan sa social media itandi sa tradisyonal nga pamantalaan mao nga tanang mapatik ug mapublikar sa naulahi, dili na basta mapapas o mausab.

Mas kasaligan ug mas dunay kaakohan ang mga tagsuwat sa mga balita, mga kolumnista ug uban pa kun itandi anang kadaghanang naa sa social media.

Sa mga lunlong tigsunod sa Banat News, daghang salamat sa 31 ka tuig ninyong pagsalig kanamo.