Dakoa sab uy

Sigurado ko nga dili gyud maaprobahan kining awhag sa labor sector nga ang daily minimum wage sa mga kawani sa pribadong balay patigayon dinhi sa Central Visayas himoon na nga P1,200 ngadto sa P1,500.

Ang lainlaing kahugpongan sa mga mamumuo sa Sugbo miduso og awhag ngadto sa kadagkoan sa Regional Tripartite Wages and Productivity Board (RTWPB) nga dugangan ang sweldo sa mga trabahador.

Apan abtik nga mipasidaan ang employer sector nga kon ihatag ang gipangayo nga dako kaayong usbaw sa sweldohan, mosamot ang problema kay daghan man ang mga balay patigayon nga manirado na lang.

Bitaw, bisan ako makaingon sab nga subra ra gyud kaayo ang usbaw sa minimum wage nga gipangayo sa labor sector. Bisan na man tingali og sila maoy namatigayon, mosupak gyud sila kay pwerteng dakoa sa usbaw.

Way lalis nga angay’ng usbawan ang sweldohan sa mga kawani, apan kon usbawan nimo og P900 ang sweldo aron mahimong P1,500 ang adlaw, ug bisan na gani P1,200 lang ang adlaw, pipila na lang ang makasweldo niini.

Sa ato pa, daghan nga mga kompaniya ang modeklarar na lang og bankruptcy, sa ato pa “napordoy” na og mao nga manirado na lang. Kon kini mahitabo, mosamot ang problema sa mga trabahador.

Mao nga ang kadagkoan sa RTWPB angay gyud nga motimbang-timbang pag-ayo kabahin sa ilang pagahimoon kabahin sa gipangayong usbaw sa sweldo.

* * *

Kinahanglan tingali nga dunay balaod nga mugnaon aron pahamtangan og bug-at nga silot nga pagkapriso ang mga opisyal ug kawani sa Department of Public Works and Highways nga makigkunsabo sa mga tikasan nga kontraktor sa mga proyekto sa kagamhanan.

Maisip nato nga makigkunsabo sila sa pagpanikas kon ang mga kontraktor dili motuman sa desinyo ug mga specifications sa proyekto unya aprobahan lang gihapon sa kadagkoan sa DPWH bisan og nasayod sila nga naalkanse ang kagamhanan niini.

Pananglit gilatid sa desinyo nga baga ang pagsemento sa Flood Control Structure, unya nakita sa inspector nga wa tumana ang anaa sa desinyo, apan giaprobahan ra gihapon, kana basehanan na nga ang project engineer ug inspectors, apil ang kadagkoan sa DPWH silotan na.

Sigurado ko nga dunay mga kontraktor nga dili motuman sa desinyo sa project, pananglit kon pila kabook kabilya nga gamiton, kon unsa anmg gidak-on sa mga kabilya nga gamiton, ang timplada sa semento, bas ug graba, ug labaw na ang giladmon sa Foundation.

Kinahanglan gyud nga ang mga project inspector moadto gyud kanunay sa project site aron matan-aw niya. Galing lang kay kon taptapan ang ilang mga mata sa binukhad nga papel de bangko, posible nga dili na gyud sila makakita sa depekto.