Pagpamalandong matag Domingo

Diha sa pagkabahinbahin Agosto 17, 2025: Ikakawhaan  nga Domingo Sulod sa Tuig

Mga Pagbasa: Jer. 38;4-6,8-10/Sal. 40/Heb. 12;1-4/Lk. 12;49-53

Usa ka tim-os nga damgo nga ang tanan magkahiusa. Bisan gani ang atong Langitnong Amahan adunay damgo nga ang tanan magkahiusa gayud. Apan ang buhing kamatuoran nagtudlo nga anaa gyud ang panagsumpaki gumikan sa mga nagkadaiyang mga hinungdan ug baruganan.

Ang atong Ginoo nipahimangno  nga ang iyang presensiya ingon man pagtulon-an ang wala man magkahulogan og panaghiusa hinunoa, kaungkagan ug pagkabahin bahin mismo gani sulod sa pamilya. Ngano man kaha?

Kini tungod kay adunay dakong kahigayonan nga magsumpaki ang pagtulon-an sa Ebanghelyo ug ang naandang balansayon sa kalibutan. Kini tungod kay ang Gospel Values demanding kaayo ug kun wala ang grasya sa Dios, usa lamang ka dakong duhiraw kining tanan.

Ang mga tawo nga nagsunod sa pagtulon-an nga dili iya sa ebanghelyo ang masuko ug masilag kanila nga nagsunod niini. Bisan gani sa kaugalingong sakop sa banay. Hinumdomi nga karong mga panahona ang blood is thicker than water dili na kasaligan. Kay bisan gani ang sakop sa pamilya mahimong imong kaaway gumikan sa nagkalain laing baruganan ug pagtulon-an nga gisubay.

Apan angayan natong hinumdoman nga ang maong sitwasyon makapadasig kanato alang sa mas halawomnga pamalandong ug pag-angkon nga dili tanan mahimong magkauyon sa tanang mga butang. Ang mahinungdanon mamahimo kitang matinud-anon sa atong baruganan labina kun atong gihimong sukaranan ang Diosnong kamatuoran. Buhat og maayo sa tanang adlaw sa atong kinabuhi. Padilaaba ang matag relasyon ug kalambigitan sa kalayo sa paghigugma.