Gomez na-zombie?

Tingale, halos tanan nato, nakakita nag salidang ‘Zombie’, o mga patay’ng buhi (living dead) nga kusog kaayo manggukod ug mamahit-ingkib og mga tawong buhi, kinsa, kutob sa mapaakan, matakdan! Ug mahimo na usab nga usa ka zombie nga motipon sa ilang panon kang kansang kawsa usa ra – ang pagguba sa kinabuhi sa katawhan.

Mao kini ang nakita sa akong hunahuna kon giunsa ko paghulagway ang bayhon sa atong mga kongresista (hinuon dili tanan) diha sa ilang mga lihok ug matang sa inadlaw nilang pagpangalagad sa katawhan.

Taliwala sa grabing pag-abuso-pagpanghilabot-waldaswaldas ni House Speaker Martin Romualdez sa binilyong salapi kanatong magbubuhis diha sa tulo ka tuig na niyang pagkahari, siya mao gihapoy giludhan-giampoan sa mga Kongresistang nangahadlok nga dili mahatagan-maaprobahan ni Martin og dinagkong project financial funds.

Hinungdan, gisalikway ang diyosnong prinsipiyo sa kinabuhi, gipiyong ang mga mata ug walay kukahadlok mipasawom sa ilang kalag ngadto sa nagdilaab nga impiyerno. Bahala nag ang ilang gihimo nakapatakod sab sa ubang mangangalagad sa kagamhanan.

Ang Kongreso gihugpaan nag daghang zombie, nga sobra na sa himabaw sa panon ang gidaghanon. Sa sinugdanan, usa ra unta – si Martin. Apan tungod kay tanang kongresista-representative, moagi man gyod niya oras nga sila mangaplay ug magpaaprobar og dinagkong pundo pinansiyal alang sa mga proyekto, aw, mapaakan gyod sila niini!

Ug unsay resulta? Mahimo sab silang zombie. Diin, hasta ilang igsuon, ginikanan, higala, asawa’g anak, unayon nila sa pag-ub-ob ang liog hangtod matakdan pagka-zombie kang kansang kaisipan giangkon na sa kangitngit.

Ug wala na makaila sa mga maayong buhat ug tulomanon nga anaa sa kahayag.

Si Leyte 4th District Representative Richard Frank Icasiano Gomez, kinsa nailhan nang ligdong-honest-lig-ong mangangalagad, kinasingkasing nakigkombati sa Quadcom sa miaging 19th Congress, mibarog nga wala gyod matarog  ang iyang pagtug-an, nga ang Duterte’s war on drugs, nakahatag og kalinaw ug kaluwas puy-an sa ilang dapit, ay, pastilan, pag-abot sa 20th Congress, mipakitag paglubad!

Sa iyang privilege speech, siya miingon: “Ang katawhan sa ika-upat nga distrito sa Leyte, mibotar ug misuporta ni Martin Romualdez, isip Speaker of the House.”

Daghan ang nakurat-nakatuaw: “Woww, what a sudden twist of time!” Ug bisan ako mismo, nakapangutana: “Rep. Gomez, na-Zombie na?” Makapaguol, uy!