Pagkabagdok ni Duke
Dihang napasar ang balaod sa pagtukod sa Liloan Children’s Hospital niadtong 2022, human giaprobahan sa House of Representatives ubos ni kanhi Speaker Lord Alan Velasco ug sa Senado ubos ni kanhi Senate President Tito Sotto ug gipirmahan ni kanhi Presidente Rodrigo Duterte, giangkon ni Kongresista Duke Frasco ang tanang kredito.
Dihang gihimo ang groundbreaking sa Barangay Cotcot sa Hulyo sa niaging tuig, nga napuno sa tarpaulins nga naghuot sa iyang nawong ug ngan, gi-solo ni Frasco ang tanang pasidungog sa pagkatuman sa iyang damgo pagtukod og ospital para sa kabataan.
* * *
Pero dihang nabisto nga pila ra ka haligi ang napabarug human sa kapin sa tuig, ni-distansiya na siya sa proyekto. Dihang gipaninglan kanus-a mapadayon ang ang nahunong nga konstruksiyon, niinsistir nga wala na siyay labot sa pagtiwas sa proyekto.
Gihan-ok niyang responsibilidad ngadto ni Gobernador Pam Baricuatro, nga kapin pa lang sa buwan nga nibanos sa Kapitolyo. Giwarawara niyang balaod, nga wala niya i-detalye sa grabe niyang panghambog niadtong 2022, nga ang Probinsiya sa Sugbo diay ang mo-kontrolar ug mo-superbisar ug mogasto sa pagtukod ug sa operasyon sa ospital.
* * *
Sama sa naandan, ang paglikoy ni Frasco nakapasamot sa iyang kaapiki. Angay niyang ipasabot nganong walay lihok ang ospital sa niaging tulo ka tuig nga iyang ugangan nga si kanhi Gobernador Gwen Garcia pay nagtungkawo sa Kapitolyo?
Nganong wala man maapil ang ospital sa pinaburot nga mga budget sa administrasyong Garcia sa 2023, 2024 ug 2025? Nahadlok ba siyang manghangyo? Kay walay bilib si Garcia niya? Pun-an pang nahinayak si Garcia pag-inutil sa mga ospital sa Sugbo?
* * *
Ang pagsalikway nang Frasco sa napasagdang ospital nakapatumaw sa lain niyang bakak: Sa iyang press releases pag-angkon og responsibilidad sa pagpasar sa balaod, nipasalig si Frasco nga maserbisyohan sang mga bata sa tibuok Kabisay-an ug Mindanao.
Pero ang unom ra ka sections sa Republic Act No. 11886 wala maghisgot sa kapasidad sa ospital pag-atiman sa mga pasyente gikan sa gawas sa Sugbo. Wala sab motakda pilay amot sa nasudnong gobiyerno. Maong angay’ng mauwaw si Frasco. Ang iyang balaod igo rang nagsugo nga pagastuhon ang Kapitolyo. Mora siyang board member sa ikalimang distrito.
* * *
- Latest
