Patawad?

Pasayloa

Basaha: Mt. 18;21-19;1

Sa akong pagtungha kaniadto sa seminaryo nakahinumdom ko sa gitudlo namo ni Padre Carmelo Diola.

Amo siyang maestro sa Synoptics, ingon man sa Pauline ug Johanine Literature. Usa sa dili nako hikalimtan mao nga mao ang iyang pagtandi sa mga pulong nga Patawad ug Pasayloa.

Ang pulong patawad po matud pa niya mura lamang og kun mopalit ka og bugas nga tag 100 ang kilo unya pamenusan gamay kun patawarin sa presyo. Samtang alang sa Sinugbuanong Pinulongan: “Pasayloa” nagpasabot man og Passover kun gisayloan.

Nga sa ato pa, ang mapasayloong kasingkasing sa Dios nipitik ug nisaylo sa kadautan natong mga tawo.

Usahay subo palandungon nga kun ang Dios nisaylo sa atong kadautan aron makita Niya ang atong bili.

Kita sa laing bahin, ang dili buot maalakanse ug kasagaran buot kita mobalos.

Apan sa atong paghimo sa ingon, atong nakita nga mas mosamot ang atong kaalaut.

Mamahimong idlas ang kalinaw. Mamahimong gukdonon ang tinud-anay nga diwa sa kapasayloan.

Malisod man tuod ang pagpasaylo apan kun kini buhaton, nan, ang atong kinabuhi mamahimong balaanon bisan pa man kun ang pagpasaylo, dili sa tanang panahon magbunga og pakighiuli.