EDITORYAL - Sekretong pagluib sa uban

Usa sa dakong rason nganong padayun ang China sa ilang agresibong mga aksyon aron ilugon ang West Philippine Sea ug balewalaon ang international laws mao ang ilang impluwensiya sa pamatigayon o negosyo sa tibuok kalibutan.

Kini bisan pa og suportado sa daghang mga nasud ang Pilipinas aning isyuha nga gipalig-on pa gyud sa 2016 Arbitral Tribunal nga nag-ingong walay legal nga basihan ang China aron angkunon ang 200 nautical miles exclusive economic zone sa mga Pilipino.

Dili ang ilang armas o kasundalohan, kondili ang ilang ekonomiya, mao ang ilang gahum.

Wala lang kini kaayo mabantayi sa kadaghanan, apan kining dakong pahat sa mga supply sa produkto sa kalibutanong merkado maoy ilang gigamit pang balanse sa ilang dautang mga gipangbuhat.

Bisan gani dinhi sa Pilipinas, daghan ang nangasuko sa China ug makita kini diha sa social media, apan duna pa gihapoy mga Pilipinong modupa o modepensa kanila.

Dili kining mga binayrang troll army nga normal gyud modepensa sa China ug sa mga negosyanteng politiko nga mga kaalyado nila dinhi.

Kondili kining mga ordinaryong mga negosyanteng Pilipino.

Tungod kay halos tanan nilang produkto gikan sa China. Kun magka giyera, dako ni og epekto sa ilang negosyo.

Maong mabantayan gyud sila sa ilang mga posts nga  nga sawayon ang gobiyerno sa Pilipinas sa pagsukol-sukol batok sa China diha sa WPS.

Sagad ani nila mga dayag sab nga supporters ni kanhi presidente Rodrigo Duterte nga sa iyang panahon nagkasuod ang gobiyerno sa Pilipinas ug China, ug tungod ani, daghang mga negosyanteng Pilipino ang nakabaton og mga koneksyon didto.

Apan naa say uban nga samtang gimahal nila ang Pilipinas ug ang katungod ug soberiniya niini, naglibog sila sa ilang posisyon kun asa molugar, kay ang ilang negosyo nabuhi tungod sa mga produkto gikan sa China.

 Kay ang China dunay kapabilidad ug makinarya nga maka- prodyus og daghang produkto, bisag ubos ang kalidad mas barato kini itandi sa uban.

Apan husto ba nga moluib sa imong nasud tungod lang sa negosyo?