Manny more money

Pinangga gayod si Eight World Boxing Division champ Emmanuel ‘Manny’ Pacquiao. Kay bisan miagi siyag pagkagumon sa mga dagkong sugal sa casino, diin mopilde siyag minilyon ug daghang dumadapig-kahigalaan-boxing fans ang nahingawa nga basig mao ra kini makahurot sa mga dolyares nga gikita ni Manny gikan sa dugoon niyang mga away, hangtod karon nagpabilin siyang usa ka bilyonariyong boksidor sa tibuok kalibotan.

Hinuon, human mamati sa inahanong tambag ni kanhi Presidente Gloria Macapagal Arroyo nga hunongon na ang maong daotang bisyo nga delikadog makapabalik niya ngadto sa pagka-nuog (rags), hingpit ra kining natalikdan ni Manny ilabi na kay nag-pastor na siya.

Dihang milansar pagka-presidente sa Pilipinas si Manny, migasto gyod siyag binilyon ka pesos. Napordoy ba siya? Milyonariyo gihapon! 

Sa miaging 2025 election, midagan na pod siya pagka-senador, diin migasto na sab siyag minilyon ka pesos. Unya, pilde ra ba? Ug nahutdan bag kuwarta si Manny? Dato gihapon!

Unya human mapilde sa maong eleksiyon, gitangtang dayon niya sa hayhayan ang retirado niyang gloves ug mibalik pagpamoksing ibabaw sa MGM Grand Garden Arena, Las Vegas, Nevada, niadtong Hulyo 20, 2025 (Manila time) aron makigkombati sa mas bata, mas taas og barog ug mas taas ang huyad sa mga kumo nga si WBC Welterweight Division champion Mario Barrios, diin miresulta man tuod sa kontrobersiyal nga majority draw, aw, nakahakot gihapon si Manny og gibanabanang mosobra gihapon sa usa ka bilyon pesos (P1B).

Tungod sa maong impresibo ug daw walay paglubad nga kapaspas-kakusog sa iyang mga kumo bisan anaa na siya sa edad nga 46, tanang nakakita nakurat. Gani, siya man gyod unta ang angay modaog!

Hinungdan, nakaabiyerto hinuon kinig dugang pang mga away batok sa mga mahalong boksidor sa umaabot mga adlaw. Labi nag madayon ang gikahinamang Pacquiao-Mayweather rematch nga seguradong mokita gayod og minilyong dolyares.

Nga sa ato pa, dili na gayod mapobre si Manny. Kay bisan siya tigulang na, mora man lamang siyag magkawos og salaping binandol sa Las Vegas MGM Grand Garden arena Kay ang mga promoter-sikat boxers man ang maglumbag duol niya aron si Manny mokitag more and more money.

Pagkasuwerte nga linalang. Unta, dili na niya usikan sa natad sa politika!