Kun ang gugma dili maantigong moantos

Matud pa ni Santa Clara: “Kun ang ugma dili maantigong moantos, nan, dili kini takus pagatawgon sa maong ngalan!” Lahi ang panlantaw sa kadaghanan kalabot sa gugma.

Ang gugma alang kanila usa man ka fairytale. Fairytale nga dili maantigong moantos ug mosakripisyo tungod ug alang sa pulong paghigugma.

Ang sukaranan sa gugma ug paghigugma ato man nga makita diha mismo sa sanglitanan sa atong Ginoong Jesus nga nitahan sa iyang kaugalingon ingon nga halad alang sa atong kaluwasan. Siya ang nasakit aron kita mamaayo.

Sa laing bahin, ang gugma dili mahimong ilahi sa kamatuoran. Kay diha sa gugma dili mahimong puy-an kini uban ang bakak.

Sayon lang kaayo ang pag-ingon og I Love You apan ang pangutana mao: “Kun makita ba kini sa buhat?”

Daghang mga pulong tam-is paminawon daw dugos apan sa kaulahian mapait sama sa apdo.

Si Santa Clara nisunod sa mga tunob sa iyang katagilungsod nga si San Francisco sa Asissi ug silang duha nagpakita anaa sa paghigugma ang tinud-anay nga kalipay.

Diha paghigugma anaa ang tinud-anay nga kalinaw ug pagmaya. Matang sa kamaya nga makatakod. Matang sa pagmaya nga makahingkod.

Ang pag-antos kabahin sa panaw sa paghigugma dili tungod kay napugos kita kondili tungod kay diha sa paghigugma dili gyud malikayan ang dakong posibilidad nga kita mag-antos ug magsakripisyo tungod ug alang sa atong gihigugma.