Luoy

Nakita mismo ni Gobernador Pamela Baricuatro ang subo nga kahimtang sa Ricardo Maningo Memorial District Hospital nga nahimotang sa lungsod sa San Francisco, Camotes dihang iyang gibisita ang nahisgotang tambalanan niadtong Agosto 8 ning tuiga.

Maoy mibantang sa pananaw sa Gobernadora ang guba nga mga lawak niini ug ang kakuwang sa kahayag sa suga. Wala hinuon maghisgot og kakuwang sa pasilidad nga medikal ang balita sa duha ka lokal nga pamantalaan. Magpasalamat lang ko kun ang tambalanan walay problema sa mga kahimanang medikal.

Ang kahimtang sa tambalanan maoy buhing kamatuoran sa wala pagtagad ni Gobernador Gwendolyn Garcia sa suliran sa panglawas ug medikal.

Ang lokal nga kagamhanan sa lungsod sa San Francisco mora’g wala pod magtagad. Ambot migahin ba ang pamunoan ni Mayor Al Arquiliano og gahin alang sa pagtabang sa operasyon sa ospital. Duda ko wala.

Pero kun wala mogahin ang lungsod og tabang para sa operasyon sa tambalan tungod ba kaha sa kagamay sa sulod sa ilang panudlanan poyde man si Mayor Arquiliano nga mahimong taytayan sa panginahanglan sa tambalanan ngadto sa kapitolyo ug ni kongresista Duke Frasco.

Ang Chief of Hospital sa Ricardo Maningo Memorial Hospital wala ba pod kaha magtulog-tulog sa pansitan?

Kay mobisita man diay si Gobernador Pamela Baricuatro sa tambalanan, nganong wala naman lang niya ipapangutana daan ni Dr. Catalan, ang Chief of Hospital sa tambalanan aron sa iyang pagbisita magdala na siya og electrician, panday ug kagamitan aron maatiman dayon ang suliran aron matawag siya nga Gobernador Aksiyon Agad ug dili lang People’s Governor. Ma-appreciate unta sa mga tawo ang iyang pagbisita sa isla sa Camotes ilabi na sa San Francisco kun iya dayon nga gipatrabaho o gisulbad ang suliran sa tambalanan dili kay igo rà nga magpahulàgway.

Sa laing bahin, luoy si Ricardo Maningo kay sa iya nakapangalan ang tambalanan aron unta siya mahindoman ug dili makalimtan. Apan ang nahitabo dili man tuod siya malimtan apan sa luoy niyang kahimtang ug dili sa pagkamaanindot nga tambalanan sa isla sa Camotes.