Tinuod nga mga rason
Mas maayo pang motug-an na lang si outgoing Cebu Archbishop Jose Palma sa tinuod nga rason sa iyang kontrobersiyal nga pagtudlo ni Monsignor Roberto Alesna sa labing dato nga kapilya sa Sugbo. Bisan nilapas na sa retirement age nga gitakda sa Canon Law.
Managsama silang Palma ug Alesna nga nagsaulog sa ika-75 nga sumad sa ilang adlaw’ng natawhan karong tuiga. Nakalahi mao nga si Palma gilugwayan og pila ka buwan sa puwesto pero gitangtang nang Pope Leo XIV. Kinsa nitudlo ni incoming Archbishop Abet Uy. Nga moasumir karong Septiyembre 30.
* * *
Kon padayong tabonan ni Palma ang tinuod nga mga hinungdan nganong kanunay niyang gitudlo si Alesna sa labing buhong nga mga puwesto, mag-anam kadaghan ang buslot nga mabantang sa mga Sugboanon.
Salamat sa kalantip, kaligdong ug kamakiangayon ni retired Court of Appeals (CA) Presiding Justice Gabriel Ingles. Gawas nga kanhi seminarista, si Ingles padayong nitabang sa Simbahang Katoliko sa nagkalainlaing kapasidad. Dili kapasanginlan nga dunay laing motibo. Gawas sa pagsusi wala ba lubaga ang mga lagda ug mga tradisyon aron pagpabor sa pari nga gipasanginlang nagtumpi og daghang katigayonan.
* * *
Pipila sa mga buslot nga gitumbok ni Ingles sa iyang matinahuron nga mga suwat ni Palma:
Kon opisina ra diay’ng Alesna ang San Pedro Calungsod Chapel sa SM Seaside City sa pagtigom og minilyon ka pesos pagtiwas sa Divine Mercy Center sa Garing, Consolacion, kinsay motuman sa mas daghang trabaho pagmisa, pagpakumpisal, pagbunyag ug pagkasal?
Nipahibawo si Palma nga pabiling magdumala sa Divine Mercy Center si Monsignor Rommel Kintanar, 76, gihatagan ba sab siya og kapilya isip pinuy-anan?
* * *
Kaparian nga nihangop sa mga suwat ni Ingles kay nasuhito nilang Palma ug Alesna nihunghong namo nga:
Si Palma dili kabalibad, ug maong dili kabadlong, ni Alesna kay gisuportahan sa mga negosyante nga manggihatagon sa mga panginahanglan sa artsodyesis;
Si Alesna dili kapasanginlan nga nagpahimulos pero dili kasaligan nga wala maglibog pila sa mga hinabang nga nadawat ang para sa Simbahan ug para niya ug labaw nang dili kapasabot sa kabtangan nga gipasangil nga iyang gipanag-iya; ug
Si Palma dili matulisok nga kakonsabo sa mga binuang pero utrong dili kapasabot sa mga transaksiyon nga iyang gisudlan.
* * *
- Latest
