Kitang tanan piniyalan lamang

Kasagaran kun dunay produkto nga gi-advertise diha sa social media platforms sama sa libro, gadget ug uban pa, kasagaran ang atong himoon mao nga mo- comment dayon kita og mine. Timailhan nga atong tinguha nga I reserved ang maong produkto alang nato.

Kini tungod kay bisan unsa nga atong gibayran o gigastohan ato man gipanag-iya. Kini ang kahulogan sa giingon nilang private property. Ug ang bisan unsang kabtangan nga giisip natong atoa ato mang giisip usab nga bililhon ug kay bililhon atong gihigugma.

Apan lahi alang natong mga sumusunod ni Kristo Jesus. Ang tanan nga atong nahuptan bisan pa man kuna tong gipalit ug gigastohan ang dili gyud matawag nga atoa. Hinunoa gipiyal lamang sila kanato.

Ug ini’g abot sa tukmang panahon ang Dios mangayo og subay kun sa unsang paagi nato kini paggamit.

Ang kadato diha sa mga butang material dili man garantiya alang sa atong kaluwasan. Unta atong higugmaon ang tawo ug gamiton nato ang kwarta.

Atong gamiton ang bahandi alang sa katuyoan sa Dios ug unta bisan pa man sa dakong panginahanglan, dili unta kita mamahimong ulipon niini.