Pulos napilde
Nitumaw si Senate Minority Leader Tito Sotto, apo sa higante sa Sugbo nga si Senador Vicente Sotto, nga maoy labing lig-on ug ligdong atol sa lima ka oras nga lalis sa wala pa i-archive ang articles of impeachment batok ni Bise Presidente Sara Duterte.
Mahimong mas suhito lang sa mga lagda tungod sa taas nga katuigan sa pagpangulo sa Senado, mas kusganon kay nilang Senador Risa Hontiveros, Senador Bam Aquino ug Senador Kiko Pangilinan. Gani, siyay gipasidunggan nga nakapugos ni Senador Rodante Marcoleta pagtahan sa orihinal niyang mosyon sa dismissal.
* * *
Pero si Sotto sab ang labing dakong pildero human sa botasyon. Si Hontiveros ray nagpabilin uban niya. Ang laing tulo ka sakop sa minority bloc nitalikod ni Sotto:
Silang Senador Loren Legarda ug Senate Deputy Minority Leader Migz Zubiri pulos nibotar og “yes” sa archiving; ug
Si Senador Ping Lacson, human nagpa-isug-isog ug nagpatuong kamao atol sa lalis, nibahag ang ikog og ni-abstain.
Mahimong wala pa lang magkasabot unsay papel sa oposisyon. O tinuod ang paniid nga mopatigbabaw ang personal nga mga baruganan kay sa pagka-sakop sa mayoriya o minoriya.
* * *
Dili sama kadaghan ang nakugang dihang gibiyaan sab si Senate President Chiz Escudero sa duha niya ka mga kauban sa majority bloc: Silang Aquino ug Pangilinan nga pulos nibotar batok sa archiving.
Makaginhawa na og luag ang mga dumadapig nilang Aquino ug Pangilinan nga nagdudang malamoy na sila sa hugaw nga pamolitika. Napamatud-an sa duha nga ang ilang pagsuporta ni Escudero wala magpasabot nga hingpit nang ilabay sa bintana ang ilang mga prinsipyo.
* * *
Kon wala ka pang kabantay, pulos napilde ang mga nag-apura sa impeachment trial ug ang mga nibabag niini:
Hanap nang daan nga mapahigayon ang impeachment trial bisan sa desisyon sa Korte Suprema nga unconstitutional ang articles of impeachment kay silang Sotto, Hontiveros, Aquino ug Pangilinan ray nipirma sa resolusyon nga nanalipod sa eksklusibong gahom sa Senado sa paghusay; pero
Napakyas sang mayoriya pagpatay sa impeachment pinaagi sa dismissal kay, karong igo rang gi-archive, mahimong mapadayon sa Senado ang impeachment trial kon makumbinser ang Korte Suprema nga nasayop sila, balihon ang ilang desisyon ug ideklarar nga constitutional diay ang impeachment.
* * *
- Latest
