Mas taas pa kay sa Korte Suprema?

Nahukman na sa Korte Suprema nga unconstitutional ang impeachment case batok ni Vice President Sara Duterte nga maoy gibasehan usab sa majority sa mga senador nga ilang gi-archive ang Articles of Impeachment diin 19 ka mga senador ang mibotar pabor niini samtang upat ang nisupak ug usa ang ni-abstain. Apan alang sa mga tawo nga wala makauyon niini padayon ang ilang paningkamot nga mahinayon gyud ang impeachment proceedings kay lagi adunay lapso ang Labaw’ng Hukmanan.

Katungod usab na nila subay sa ilang gitoohan nga angayan gyud ipadayon ang impeachment proceedings apan sa pagkakaron daw imposible na kay nidaug man ang yes votes pag archive sa articles of impeachment. Nagpasabot nga nabasura na, gipahuyang lang ang termino imbis dismiss, archive lang pastilan pareho ra gud na.

Dili makadawat ang ubang sektor nga naglaum pa nga balihon sa Korte Suprema ang ilang desisyon. Apan mora’g sumbag sa buwan ra kana sanglit unanimous ang hukom sa mga mahistrado nga unconstitutional lagi ang Articles of Impeachment tungod sa mga teknikalidad niini dihang giduso sa Kongreso. Dili ingon niana ka bugo ang mga mahistrado sa Supreme Court nga motuo lang sa mga news reports nga maoy gipagawas sa mga atat kaayo nga ma-impeach ang bise presidente. Nabutang sila diha sa kinatas-ang hukmanan tungod sa ilang katakos. Ang mga nikwestyon ra ba dili gani mga abogado ang uban.

Ugaling paboran sa Korte Suprema ang apelasyon sa Ubos Balay Balauranan seguradong maguba ang ilang kredibilidad o mawala gyud kay mapamatud-an naman hinuon nga duna silay kasaypanan nga imposible sa pagkakaron nga himoon sa mga justices. Matumpag ang hudikatora kong mag-usab-usab ang ilang decision nga igo lang silang moingon nga "ay nasayop diay ta, ato nalang balihon ang atong decision kay wala man diay sipyat ang Articles of Impeachment." Pastilan dakong damgo kini alang sa uban.

Unta sa sinugdanan pa lang gipaneguro sa House nga mapadayon ang impeachment proceedings, gihan-ay nila og maayo gisunod ang proseso aron walay babag sa ilang tinguha. Apan gidalidali nila kini pinaagi sa pagpapirma sa mga miyembro sa House of Representatives ug nagdahom sila nga “okey na to, ang Senado na ang bahala.” Apan wala man magpadala sa pressure ug labaw na nga wala magpadiktar ang Senado sa gusto sa House ug dinhi na niungot ang kaso hangtud nga hingpit nga nabasura este na-archive.

Duna pa may higayon sa sunod tuig nga ilang han-ayon ang pagsang-at sa Articles of Impeachment, kanang wala na gyuy technicalities aron mosutoy ang kaso ug matuman ang ilang gitinguha nga hingpit mapapas ang bise president. Sa tinuod lang kini maoy tumong ug tuyo sa uban nga hawanan daan ang dalan sa ilang ambisyon sa umaabot nga 2028 nga eleksiyon. Kay kong dili nila mapiangan si VP Sara, delikado sila.

Personal nako nga baruganan okey ra gyud unta nga mapadayon ang impeachment proceedings aron mapamati nato unsaon pagpanalipod si Sara ang iyang kaugalingon aron usab malimpyohan ang iyang ngalan. Mao pud kini ang gipadayag niya ug sa iyang legal team. Apan angayan usab nga respetohon ang atong balaod aron dili mosangpot sa constitutional crisis tungod lang sa mga personal interest sa mga tawo. Sa tinuod lang politika ang hinungdan niini tungod sa kahakog sa gahum hinoon ang tanan.

Sa kadaghan sa trabahoon, kana nalang sa ang inyong tutokan alang sa serbisyo sa katawhan.