San Juan Maria Padre Kura

Agosto 4 mao ang paghandum kang San Juan Maria Vianey. Siya ang patron namong mga padre kura. Dalaygon ang iyang kinabuhi nga puno sa birtud tawhanon man o teolohikanhon.

Dili pud lalim ang iyang naagian nga panaw padulong sa pagkapari ug gani mismo diha sa iyang pagkapari.

Daghang mga pagsulay ug pangltuos magikan man sa tawo o sa yawa gyud mismo. Walay tarong iyang paghikatulog gumikan panghasi nga diabolical.

Apan bisan pa man ning maong mga pagsulay siya nilahutay aron mga kalag sa impiyerno makalikay. Unta makasunod intawon kami ning maong balaanong kinabuhi ni San Juan Maria Vianney.

Ania ang mosunod nga pamaagi ni San Juan Maria sa pagdumala sa iyang parokya:

1.    Personal nga pagkakabig ngadto sa Kasingkasing ni Jesus. Nagtuo siya nga ang iyang kinabuhi nga nausab ug naumol subay sa kasingkasing sa Labaw nga Pari nga si Jesus makapadasig sa iyang mga parokyano pagsunod sa maong sanglitanan.

2. Katesismo ngadto sa mga Kabataan ingon man sa mga hamtong.

Ang pagtudlo sa katawhan kalabot sa mga sukaranang pagtulon-an sa pagtuo dako og kahimoan aron sila makasabot sa dakong bili sa simbahan ug sa Dios diha sa ilang kinabuhi.

3. Pagkumpisal. Iyang gigahin ang katawhan aron mamahimong makabalik sa sabakan sa Dios pinaagi sa pagkumpisal.

Gigahinan niya kini og hataas nga mga panahon. Tungod niini suko kaayo ang yawa kaniya.

4. Katilingbanong pagpakabana. Nigahin siya og panahon sa pagbisita sa mga katawhan sakop sa iyang Parokya ingon man ang makanunayong pagbadlong sa mga dautang patigayon nga magdala sa tanan ngadto sa pagpakasala.

5. Gugma sa Santos nga Eyukaristiya. Ang pagasaulog niini uban ang kasolemne ingon man ang paggahin og linain nga gutlo aron sa Ginoo makigkukabildo ang nakahatag og kalig-on kaniya.

6. Parianong kinabuhi. Walay Misa kun walay pari. Ang espirituhanong kinabuhi sa pari dako og kahimoan aron mamahimong mas masabtan niya ang iyang misyon ug human masabti iyang higugmaon.

Unta masunod ko kini sa akong kinabuhi bisan naman lang sa hinay apan Seguro nga paagi.