EDITORYAL — Unay sa luwag!

Maayong utingkayon sa mga hingtungdang ahensiya sa gobiyerno kun si kinsa ning mga magbabalaod nga nakakwarta sa mga proyekto gamit ang pundong gigahin para sa ilang mga proyekto diha sa ilang mga distrito.

Klaro kaayo ni nga usa kini ka matang sa kurapsyon, pamintaha sa uban ug immoral para sa usa ka public servant kay naay balaod niana nga nagdili kanila ug sa ilang mga kabanay nga makaangkon og mga kontrata sa mga proyekto sa gobiyerno.

Naa man untay mga mekanismo ang gobiyerno batok aning mga bentahosong opisyales sa gobiyerno sama aning  Code of Conduct and Ethical Standards for Public Officials and Employees, nga pinatuyo batok sa mga kurakot ug abusadong opisyales sa gobiyerno.

Pero pabaga ra man og nawong ang uban, mangita ra og mga pamaagi aron nga makasapi sa mga proyekto. Unay sa luwag!

Si Senador Panfilo “Ping”Lacson sa usa ka interbyu sa DZRH mibutyag nga niadtong 2022, adunay 67 ka congressman nga matud pa maoy kontraktor sa ilang mga proyekto. Pagkahayahay ba ani nila, walay lusot ang kwarta sa katawhan kondili padung ra gyud sa ilang bulsa.

Husto kining kamandoan ni Presidente Ferdinand “Bongbong” Marcos Jr. nga  maghimo og imbestigasyon  bahin aning mga kapalpakan sa mga flood control projects sa tibuok nasud.

Kay kining mga proyektoha usa sa pinakadako og gigahin nga pundo kada tuig. Angkunon man o dili aning mga magbabalaod nga nag-negosyo sab og construction, naglaway sila matag deliberasyon sa budget appropriations sa Department of Public Works and Highways.

Kung tinuod ning mga nanggawas nga alegasyon, dili na sab tingali ikahibulong kun nganong kining ubang mga proyekto halos dili mahuman-human. Kung mahuman man, kadudahan kun epektibo ba o molahutay.

Kay kun maguba, sila man sab gihapong mga kongresista ang “mangita” napud kunohay og pundo para ani, unya ilaha lang pud gihapong kompanya o kompanya sa ilang mga payente o pinalabi maoy padag-on sa mga biddings inabagan sa pakigkunsabo sa mga hiwing sakop sa DPWH.

Mao nga sakto gyud ang pulong ni PBBM sa iyang ikaupat nga SONA: Mahiya naman kayo!