Sunod nga matagak
Walay nakatambag ni Tourism Secretary Christina Garcia Frasco nga usa sa labing lisod nga kalbaryo sa usa ka sakop sa gabinete mao ang pagpanalipod sa iyang budget atubangan sa mga kongresista nga determinadong mangita og buslot sa iyang mga nahimo. O, sa iyang kaso, wala mahimo.
Mas apiki pa g’yud ang kahimtang kon gikontrahan siya ni House Speaker Martin Romualdez. Makatugkad sa ka-imposible sa iyang sitwasyon kon mangonsulta sa iyang kanhi suod nga higala nga si Bise Presidente Sara Duterte. Nga ambot makigsulti pa ba human niya tampoka sa bukobuko.
* * *
Katulo budhii sa pamilya ni Frasco ang bise presidente nga nikuha niyang tigpamaba sa kampanya sa 2022:
Una, nagpabilin si Frasco sa gabinete bisan nagkinahanglan sa iyang suporta si Duterte dihang ni-resign sa Lakas-CMD niadtong 2023 ug sa Department of Education niadtong 2024;
Ikaduha, nibiya ang iyang inahan nga si kanhi Gobernador Gwen Garcia ug sa ilang dinastiya gikan sa PDP-Laban ni kanhi Presidente Rodrigo Duterte sa niaging tuig; ug
Ikatulo, ang pagpirma sa iyang bana nga si Kongresista Duke Frasco sa impeachment complaint batok sa bise presidente niadtong Pebrero.
* * *
Human sa pagbugalbugal sa kampanya sa iyang inahan sa pagkapriso ni kanhi Presidente Duterte sa The Hague, nga usa sa gituohang nakapa-pilde sa kanhi gobernador sa niaging eleksiyon, nideklarar ang ilang dinastiya og gubat batok ni Romualdez:
Nga gipasanginlan sa kampo sa iyang inahan nga sekretong nisuporta sa kandidatura ni Gobernador Pam Baricuatro ug nitabang pagmaniobra sa automated counting machines; ug
Nga gihikawan sa suporta sa iyang bana kay gipasanginlan nga maoy nakapabuak-buak sa nasud.
* * *
Sa pag-atubang ni Frasco sa mga kongresistang iyang gipasanginlang walay uwaw nga maoy hawod sa budget hearings:
Mabisto nga gilaslasan ang iyang budget niadtong 2023, dihang sikit pang mga Duterte sa administrasyon, kay 65% ra sa budget sa 2022 ang aktuwal nga nagamit;
Si Kongresista Frasco, nga deputy speaker niadtong higayona, nakaapil sa deliberasyon ug wala mosupak sa laslas sa budget sa iyang asawa; ug
Peligrong mabanhaw ang iyang bulilyaso sa “Love The Philippines” campaign ug pagpanghatag og Titay’s products (nga walay kukaulaw nga gitaptan sa mga nawong nilang magtiayon) ngadto sa ASEAN tourism ministers niadtong 2023.
* **
- Latest
