Desisyon sa Korte Suprema, dapat sundon

Human sa makuting pagsusi-tuki ug pagtuon, mideklarar ang Supreme Court (SC) pinaagi sa unanimous decision nga ang pagpa-impeach ni Vice President Sara ‘Inday’ Z.  Duterte sulod lamang sa usa ka adlaw sa Kongreso ug karon nag-ung-ong na sa Senado alang sa pinaleng paghukom, ang mga pasangil nga gibasehan sa Kongreso ug Senado, matod pa sa SC, wala mahisubay sa atong Batakang Balaod, busa, unconstitutional!  Nahulog sa walay nada.  Ug dismissed na ang maong impeachment.

Apan daghang kongresista ug senadores, kinsa bisag dili mga abogado, nagpaka-abogago, gustong mohawod pa sa desisyon sa Kinatas-ang Hukmanan, mipasiatab nga wala kuno kini hurisdiksiyon sa naasoyng impeachment kay iyaha kini sa Senado ug dili sa hudiktadura.

Tungod sa pagkaatat na atat sa mga attack dogs sa Marcos-Araneta-Romualdez force, nga gusto gyod niilang idemolis sa ilang dalan si Inday sa dili pa moabot ang tuig 2028, haskang gyod nilang nakasaway-nakasungay-nakatamay sa pinaleng desisyon sa Supreme Court.

Ambot, nasayod ba kaha kini sila, nga kinsa kadtong mokontra, mobugalbugal, dili morespeto, unya mohimog aksiyon nga dili nila sundon ang hukom sa SC, mahimo silang masilotan-makasohan ning mga mosunod: Contempt of Court, Violation of Code of Conduct (RA 1673), Criminal liability under the Revised Penal Code, Disqualification from public office, Impeachment (for high officials) ug uban pa?

Hinuon, may mga tadhang abogadong senador ang mipakita gilayon og kinasingkasing pagtahod ug pag-uyon sa desisyon sa SC. Hasta, si kanhi Senador ug karon House Rep. Leila de Lima, kinsa sa sinugdanan grabi ka nakasaway ug nakasupak, ay pastilan, ang kadali rang nakapadala og letter of apology ngadto sa Supreme Court, diin siya mipadayag nga husto ang nakab-ot nga hukom sa tanang mahistrado.

Lalim bay, ang mga abogado adunay gipanumpaan nga tahuron g'yud ang unsay hukom sa SC. Kay kon kini mosupak, mokuwestiyon o mobugalbugal, mahimo diayng matangtangan og lisensiya ang maong abogado.

Ingon niini kasagrado ang papel sa paghukom nga gibitbit sa Korte Suprema, nga walay si bisan kinsang hawod nga makapapilo, ni makapabag-o. Tungod kay kini, final and executory!

Na hala, kadtong mga Kongresista-Senadores nga gusto gyong ipadayon ang Sara impeachment trial sa Senado, go ahead, padayon! Buwahan, masayran unsay inyong kapaingnan?