Sa dili pa mohungit
Kay magpangutan-anay man mi unsay pamahaw kada Sabado sa buntag sa among programang Palagdas, nga gidumala ni Classmate Yul Julia, nadani akong pagtagad sa bag-ong Chinese restaurant nga natultolan sa suod namong higala. Wala ko mahibulong nga wala kong kaila kay tagsa na man lang ming manggawas sa balay.
Nakuryuso ko sa mga putahe nga iyang gihisgutan. Salin kuno sa ilang panihapon. Mao na lang say gipamahaw. Maayo sang mokaon ning among higala. Pero sa kadaghan sa ubang mga butang nga among giistoryahan nakalimot ko og pangutana niya kon lami ba.
* * *
Kay nagplano man mi sa akong asawa nga mangaon sa gawas sa pagka sunod semana, akong gi-Waze ang restaurant. Nahimutang sa kinapusoran sa Cebu City, duol ra sa suki namong mga kan-anan, natago lang tingali og diyutay maong wala namo makit-i gikan sa dalan.
Ako na lang sang gi-Google unsay kinakusgan nilang mga putahe. Gi-cover sa local newspapers ang ilang opening. Nipasalig ang management nga lahi ang ilang pagkaon kay sa mga nasuwayan na sa mga Sugbuanon. Maong gikuha nako ang ilang mobile number aron makapareserba sa gikasabotang adlaw.
* * *
Bisperas sa among lakaw, nabalaka si Iris nga tingali daghan og vetsin (wala koy problema, pero maglain ang iyang paminaw ug dili na mokaon). Nahadlok sang mangimbitar sa among mga higala sa kan-anan nga wala pa namo masuwayi.
Maong didto na lang sa among suki nga Korean restaurant. Diin sama sa naandan nabusog ug nalingaw mi. Gipakapinan pa gyod sa tag-iya sa among paboritong dessert. Maong wala nang kahisgot nakasuway bang among mga higala sa bag-ong kan-anan.
* * *
Dihang na-istorya ang lain namong higala, nga ganahan sang mokaon, ako siyang gipangutana nakasuway na ba sa bag-ong restaurant. Nanagana siya og tubag. Niingon nga nakakaon na sila og kausa. Ug nagkasabot ang ilang grupo nga dili na mamalik.
Na-istorya sang Iris ang iyang higala nga giimbitar sa pag-abli sa restaurant kanus-a gihukad ang tanang putahe. Igo lang niingon nga wala siyay mahinumdoman, ug wala sab siyay gihandom nga matilawan pag-usab, nga putahe. Sama sa naandan, sakto ang atong katiguwangan: Mas maayong mangutana sa dili pa molayat. O, ning kasoha, sa dili pa mohungit.
* * *
- Latest
