Bunga ra gyud sa hambog ug garbo ang tanan

Bisan pa man og segurado na daan nga walay mahitabong binukbokay tali nilang Davao City Acting Mayor Baste Duterte ug PNP Chief General Nicolas Torre sa venue nga giandam kagahapong adlawa apan daghan gihapon ang nag-atang. Bisan kadtong mga dagkong opisyal sa kagamhanan niadto gyud aron mosud-ong sa gikahinamang kombate nga gitumong kuno alang sa mga naapektohan sa kataglagman didto sa kaulohan.

Pastilan, giilad nila ang ilang kaugalingon nga daw naghinam hinam pero sa luyo ug atubangan sa ilang huna huna kabalo sila nga dili na madayon kay toa man kuno si Baste sa Singapore.

Tinuod unang nanghagit si Baste kay ganahan na lagi siya makasumbag og unggoy pulong pa niya ug kining iyang hagit wala palabya ni General Torre kinsa midawat niini ug dayon nagpakita siya sa iyang pagbansay bansay nga seryoso siya sa iyang tinguha nga makigharong sa nanghagit kaniya kay alang kaniya mas maayo nga matigayon ang fight for a cause alang sa mga nabiktima sa katalagman.

Apan ang nanghagit mora’g yamayama ra man to iyaha ug dili seryoso kay duna man usab kini gipangayo nga kondisyon nga gikinahanglan nga ipaingon man niya kang Torre kang PBBM nga ipa drug test ang tanang mga elected officials gamit ang hair folicle nga imposibleng mahitabo. Milarga sa laing nasod si Bastie kauban kuno ang iyang pamilya nga nagpasabot nga wala gyuy boxing for a cause nga mahitabo.

Bisan pa man niini giandam gyud ang venue, dunay boxing ring ug duna say mga tawo gna nanulod gyud kay mosaksi sa away, tungod kay boxing for a cause duna gyuy gihatag sila nga bayad nga matigom ug ipang apod apod sa mga nanginahanglan.

Bright pud ni si Torre kay bisan og nasayod siya nga indyanon siya ni Bastie iya gihapon nga gipadayon ang kunohay ilang binukbokay, sa mailad lang alang niadtong magpailad nga motan-aw.

Nganong nakaingon ko nga bright si Torre, gigamit niya ang katalagman sa kaulohan isip kahigayonan nga mapakaulawan niya si Bastie kay nasayod siyang daan nga kutob lang sa baba ang hagit niini.

Gawas pa gigamit niya ang oportunidad nga makatigom og kwarta gamit usab ang ngalan sa iyang challenger aron ihatag sa mga calamity victims sa ingon siya ang mogawas nga isog kay nikakak man ang iyang kontra ug labaw sa tanan kong matinuod nga dunay proceeds sa boxing ug iyang ipang apod apod sa mga tawo mogawas nga siyang bayani, champion nga walay kontra.

Sa habig usab ni Duterte, unta sa wala pa siya moluwat og paghagit gihunahuna niyang daan kong kaya ba niyang barugan ang iyang hagit, nagtoo siya nga dili mokagat ang heneral kay abi usa na ka taas nga opisyal sa PNP ug palabyon nalang ug dili siya patulan kay guwang guwang na ba ni, pero na under estimate niya si Torre.

Unta nabasa na niyang daan ang kinaiya niini nga lahi itandi sa ubang mga PNP Chief, buhaton niini ang mga butang nga impossible lakip na ang pagdakop ni Pastor Apollo Quiboloy ug mismo ni kanhi Presidente Rodrigo Duterte nga nadala gyud intawon sa The Hague.

Sa wala pagtunga ni Bastie sa iyang binukbokay nahulog nga siya ang manok nga nikakak nga nahadlok sa tigulang nga heneral.

Hinoon duna pay laing higayon nga mapamatod-an ni Duterte ang iyang hagit. Anugon nga duna na siyay higayon nga bokbokon ang tawo nga nakaingon sa pagpadala sa ICC sa iyang amahan. Unsa man ang iyang kahadlokan nga batan-on siya itandi sa tiguwang, kong sa tigbakay siya ang inilog.

Bitaw, kining tanang bunga ra gyud ni sa garbo nilang duha, binata ra kaayo nga gisakyan ra usab sa mga tawo nga hilig pud og sabong sabong aron dunay kalingawan. Sa kadaghan sa problema karon nga angayan nilang tutokan nganong mas gipili nila ang mga ginagmay nga isyu nga walay makuha ang mga tawo.

Kining duha pulos nagbinata nga "gipayt balaw" o gikaryo sa sabongan sa mga tawo nga nagbinata usab nga misakay sa isyu. Mas maayo nga manarbaho nalang mo inay mohimo sa mga butang nga walay hinungdan ug bunga sa inyong mga hambog ug garbo.