Kaykayon gayod ang ukayonon

Nakurat ang mga Sugboanon. Ang kanhi nagpiyongpiyong rang mga mata, karon nanglugwa human makamata sa maot kaayong balita, diin nabulgar nga ang mga terminal sa probinsiya sama sa Cebu South Bus Terminal (CSBT) nga gibutangag pribadong pansayan ug mobayad ang kutob sa mogamit og: P10 kon mopatil-is ug P20 kon moutong, 5% ra diay sa kinatibuk-ang kitaon niini matag bulan ang mahipunta ngadto sa panudlanan sa Kapitolyo.

Nga sa ato pa, kon mokita kinig P500,00, P25,000 ray maiya sa gobiyerno.  Sobra ra kagamitoy. Butang nga nakapasaba sa mga nagpakabanang media, kinsa wala makalikay sa pagduda nga basig adunay laing bolsa nga gisudlan sa laing porsiyento nga pahat sa kita niini?

Hinuon, mga katahap lamang kini nga nagkinahanglan pag dugang palawom sa imbestigasiyon nga nasugdan na sa bag-ong Governor Pamela ‘Pam’ S. Baricuatro’s administration. Ug unta dili mohunong hangtod mosangko ngadto sa kinaildmang bahin, nga maoy makasulti sa tinuod.

Kay tiaw bay, Si Gov. Pam mi-order na nga libre na ang mousar sa maong mga pansayan, apan gipaningil gihapon sa pribadong management sanglit aduna kuno silay kontrata nga pinirmahan sa ilang kompaniya ug ni kanhi Gob. Gwen Garcia, diin sa tuig 2028 pa matapos, unya renewable pa!

Makahibulong.  Ang CSBT iyaha sa probinsiya. Responsibilidad ang paghatag og pambublikong pansayan sa mga biyahedor ug sa mga tawong maabtan og kalabayan panahon nga mosugmat ang tawag sa kinaiyahan. Unya, nganong mihayir pa mag pribadong kompaniya ang kanhi gobernador nga anaa na man untay CR atong terminal? Mahimo ra man gyod untang i-enhance kini? Palimpiyohan-paguwapahan-pahumotan.

Nungkang, pakompetinsiyahan og pribadong sektor! Dili ba, may pagka-conflict of interest na hinuong miluta?

Maong sa Aksiyon Agad nga gipakita ni Gob. Pam, kinsa wala pa gani usa ka bulan gikan sa iyang paglingkod, daghan nang nahimong kaayohan alang sa katawhan, apil na kining pag-imbestiga sa CSBT’s controversy, bisan ang mga kritikong magsisibya-maglilindog-magsusulat, napasaludo kaniya!

Diin sila miawhag pa more!

Nga kinahanglan kaykayon gyod ang tanang ukayonon nga nagpahipi-nakatago diha sa mga ngitngit bahin sa Kapitolyo. Buwahan, ang mga hugaw nga giulod na sa tumang kabaho, makit-an ug hingpit malimpiyohan. Kini tungod kay wala gyoy kangitngit nga matago kon maiwagan sa kahayag.