Gwatsinanggo ug walay respeto?

Ni’ng padayon nga pag-baha sa daghan’g lugar sa Pilipinas tungod sa ulan nga dala sa ‘habagat’, misugyot si Bise Presidente Sara Duterte nga magdala ang katawhan og tubig-baha ngadto sa Malacañang aron adunay mainom si Presidente Marcos, Jr.  Gisaway usab ni Duterte ang “political scapegoating” sa administrasyon tungod sa pagsuway niini paglihay sa tulobagon.  Mahait ug puno sa kantalita ang giluwatan nga pulong sa bise presidente.  Mahimo hinoon kini’ng isalindot nga komedya lang. Kining style sa bise presidente, mora’g nahaum sa pagya nga, “Aron molungtad ang usa ka politiko, kinahanglan nga siya may pagka-gwatsinanggo ug adunay gamay nga kakulang sa respeto.”  Muleeng!

‘Anesay lang’ gud!

Gipaundang ni Presidente Marcos, Jr. ang tanan’g preparasyon, sama sa pagpangtaud og tarpaulin, alang unta sa iyang State of the Nation Address (SONA) karong Hulyo 28 ug gimando niya nga ang tanang paningkamot sa kagamhanan, ipunting ngadto sa pagresponde sa baha ug uban pa’ng relief operations.  Salikwaot tinuod nga magpasiatab ang pangulo og mga accomplishments luyo sa naglurat nga kamatuoran nga nalumsan ang katawhan sa tubig-baha. Sugyot sa usa ka kritiko, “Mahimo man gihapon nga mag-SONA ang presidente, apan iyang itaho sa nasud ang tinuod nga kahimtang sa nasud.  Kay lagi, ‘honesty is the best policy’ man kaha.” Madahaan!

‘Farm-to-pocket’ roads?

Gika-dismaya ni Senador Joel Villanueva nga bisan pa man sa budget nga P1.4 billion nga gitagana matag adlaw alang sa pagpatuman sa mga flood control projecs, nagkalaksot na hinuon ang baha nga nasinati sa nasud matag tuig.  Miawhag ang senador angay nga mopatuman ang gobyerno og mga long-term nga sulbad sa baha.  Basin baya label ra ang paghingalan sa P1.4 billion budget nga flood control projects.  Matud pa sa mga kritiko, “Sama ra tingale kini sa budget sa karsada nga gihinganlan og “farm-to-market roads, apan ang nahitabo, nahimo’ng “farm-to-pocket roads.”  Fezteleern!

Sugod na’g aginod

Namahayag si Bise Presidente Sara Duterte nga gihatagan na siya ni kanhi presidente Rodrigo Duterte sa pagtugot nga modagan karon 2028 election, bisan wala pa ibutyag kon unsa ang daganan niya nga posisyon.  Nabutyag na gayod ang bukas nga sekreto.  Busa kon dili ma-impeach, daw nagpangamay na ang presidency karong 2028.  Daw mga omang sa baybayon nga mosugat sa taob sa dagat, maghinay-hinay na unya ang mga dumadapig og aginod ngadto sa bise presidente.  Makapahinumdum kini linya sa awit sa akong apohan nga nagkanayon, “Bantay boluntaryo.  Andam hinagiban, (sundang gibang!).  Misinggit ang mga alipores, ‘mabuhi kitang tanan’.”  Ateerr!

Nakabaton Na’g Garbo

Dili na mahimong kabahin sa pagsaulog sa ika-456th founding anniversary sa lalawigan sa Sugbo ang “Pasigarbo sa Sugbo”.  Ang P200 million nga pundo nga gigahin unta alang niini, gamiton na lang alang sa uban’g tourism-related activities nga labaw’ng mahinungdanon sa bag-ong administrasyon.  Matud pa hinoon sa akong amigo, “Sa kadugay na sa pagpahigayon sa ‘pasigarbo’, ug sa kadako na sa kwarta nga nagasto, syaro’g wala pa gihapon makabaton og garbo ang mga Sugboanon.” Pagkatoytoy!