Finding bitin

Naukay ang mga molupyo sa Barangay Magsico sa Lungsod sa San Fernando Lalawigan sa Sugbo human makaekyas sa iyang halwa ang usa ka sawa o reticulated python nga hilabihan nang dakoa, nahitabo kini niadtong kaadlawon sa Lunes.

Binahogan matud pa og manok ang naasoy’ng bitin maong kampante kaayo ang tag-iya nga dili kini molayas.

Apan nakugang sila nga ang manok naman lang ang nahabilin sa tangkal wala na ang higanting bitin ug nagtuo siya nga nilayas kini.

Basin gipul-an na og kaon og manok ang bitin kay nanimaho nang iti iyang ginhawaan ug nangita na kini og laing putahe sama nalang sa baboy, kanding ug ubang mga mananap maong niiksyas siya.

Apan hilabihan ka delikado kong tawo o bata ang iyang matagboan ug maoy iyang matukob. Nakuha og attention kining panghitaboa human ang tag-iya ni-post niini kinsa nangayo og tabang nga makita ang ilang bitin ug nitanyag pa og reward basta dili pasipad-an

Napulo na ka tuig nga gialimahan sa tag-iya ang bitin diin gamay pa kini dihang ilang giatiman hangtud nidako na nga niabot na gani og 16 ka tiil ang gitas-aon, 12 ka pulgada ang diameter ug moabot sa usa ka gatos ka kilos.

Dako na gyud kini nga kaya na makatukob og bata o tawo nga kasarangan lang ang gidak-on.

Bisan og anad na sa tawo ang bitin apan sa iyang mga amo lang dili sa ubang tawo nga iyang matagboan. Gawas pa first time siya nga nakagawas sa iyang tangkal diin nagpasabot nga mabag-ohan sa gawasnon nga environment.

Labaw sa tanan mopatigbabaw gyud ang iyang pagkahayop o wild animal instinct.

In fairness sa barangay basin duna silay paningkamot nga madakpan pagbalik ang bitin, ang lungsod kaha? Dihang nakaabot sa Kapitolyo ang nahitabo naalarma mismo ang provincial veterinarian kay peligro matud pa sa mga tawo ang posibleng pag atake niini kay posibleng gutom o ba kaha nanguwag o nangita og pares ang sawa. Miawhag si Dr. Mary Rose Vincoy sa mga tawo ilabi na sa mga bata nga dili maglaag laag kay basin mao kiniy matagboan ug matukob na hinoon sa sawa.

Mimando usab dayon si Provincial Administrator Ace Durano sa provincial vet nga makig alayon sa DENR alang sa dinalian nga pagdakop sa bitin samtang wala pa kini maunsa sa kamot sa mga tawo ug labaw na samtang wala pa makamugna og kadaut sa kinabuhi sa mga tawo.

Bisan og dili venomous ang sawa apan kusgan kini kaayo molikos sa iyang target nga mogopok gyud sa kabukogan sa iyang malikosan busa dili kini angayan baliwalaon kay posibleng uwahi na unya ang tanan. Alang sa uban ok lang, pero dili gyud angayan ka kompyansahan agn bitin.

Alang sa tag-iya, maayo man ang ilang intention sa pagbuhi sa sawa. Gani inatiman man gyud kay manok man ang iyang pagkaon, samtang ang tag-iya mag mantinel lang og utan busa dili pud angalan nga sawayon.

Siguro mas palig-onon nila ang tangkal nga iyang gibutangan sa usa ka mananap nga dili kakompyansahan. Unta makita na aron mahupay ang kabalaka sa mga tawo.

Hadlok man gyud ang bitin apan mas hadlok kadtong mga tawong bitin og kinaiya nga dili lang masayran nalikosan ka na busa amping lang gyud higala.