Kung walay vest, patay gyud

Kong motuman lang gyud ang mga tinugyanan sa balaod sa basic protocol sa pag-handle sa sitwasyon, ilabi na sa pagresponde sa alarma, dili gyud sila maunsa bisan pa og matusak sila sa bala.

Sama nalang sa nahitabo sa Barangay Suba sa dakbayan sa Sugbo diin usa ka polis ang napusilan sa subject sa hot pursuit operation niadtong nakalabay'ng semana. Tulo ka igo ang iyang naangkon human giunhan pagpusil sa suspek.

Maayo nalang gani kay nagsul-ob og bullet propf vest ang pulis ug didto nipilit ang slug sa 45 kalibre nga armas. Kay kong wala pa aw lapos gyud sa iyang kasingkasing ang mga bala, ang usa ka bala nakasamad gyud sa iyang kilid apan wala ra magrabihe. Bisan og nalubong ra sa vest ang mga bala apan tungod sa kusog nga impact nahospital gihapon ang pulis ginoo luwas ra siya sa peligro.

Sa nakalabay nga mga operasyon sa kapolisan ubay-ubay na ang mga pulis nga namatay kay kompiyansa ra kaayo nga gipagamay lang seguro ang hulga sa ilang kinabuhi o sobra ang ilang pagsalig sa kaugalingon jga dili na maghunahuna sa mahitabo kanila ug ang makalolooy ang ilang pamilya kong mataghapan sa gigukod nga kriminal.

Sagad sa mga nakalas kadtong wala gyud magsul-ob og panagang sa lawas, ibutang ta lang nga kalit nga alarma ang girespondehan ug wala gyud madala ang vest, pasagdan nalang ba ang kriminal?

Dili apan mapagangitaan og pamaagi nga dili na kinahanglan mobuhis sa ilang kinabuhi, ang presensiya sa panghunahuna ug ang mindset nga unahon ang kaluwasan o safety first gyud. Mag unsa man na nga magpakabayani pero patay ka na, luoy intawon kaayo ang pamilya nga mahabilin.

Sa panahon karon nga nibalik na ang mga kriminal pagka kursonada o mas milabaw pa ka mangtas nga mokilaw gyud sa mga tawo nga mosanta sa ilang binuhatan, angayan nga panalipdan daan sa mga otoridad ang ilang kaugalingon aron makapanalipod sila sa katawhan.

Balikan nako kadtong polis nga napusilan sa suspek pero wala makalapos ang bala tungod sa iyang vest. Naluwas ang pulis pero ang subject namatay kay nabaslan sa pagpusil sa mga otoridad, mao kadyo siya ang suspek sa pagpatay usa ka lalaking nagduwa og eskater sa sulod sa internetan sa ilang baranggay kinsa nalambigit usab sa illegal nga drugas.

Kining subject nga napatyan sa mga pulis nalambigit usab sa illegal drugs ug usa usab ka gun-for-hire alang niadtong dili makaremit sa halin sa drugas sa ilang sindikato. Makita nato nga ang tanan nagtuyok sa illegal drugs nga maoy nag-ulipon sa nga tawo nga mohimo og dautan ug wala na silay ilhon kutob sa ilang mabangga tipion gyud.

Busa angayan nga dili ipakagamay sa mga otoridad ang dako nga peligro niining mga tawhana nga ang kalag tua na sa kangitngit bisan og buhi pa kay nabuang sa drugas. Busa mag amping sa kanunay.