Panugon sagol pangluod makapahimangod

Niining inihap na lamang mga adlaw sa iyang pagpakabuhi, diin pagahikit-an na ni kanhi

Presidente Rodrigo Roa Duterte (PRRD) ang nagakaduol nga pultahan sa iyang pag-exit dinhi sa atong kalibotang puno sa mga limbong ug inhustisya, ug daw pagahidunggan na niya ang makahuloganong unang mga nota sa ‘My Way’: “And now the end is near”, sa walay ukon-ukon, gisultian niya sa usa ka makatandog nga panugon si Bise-Presidente Sara ‘Inday’ Z. Duterte.

Matud pang Inday atubangan sa mga diehard Duterte supporter (DDS) didto sa Netherlands, nga hugo-daot na kaayo si PRRD. Ug ania ang gipanugon sa iyang amahan kaniya: ‘Ingkaso kunog sa Netherlands gyod mamatay si PRRD, ipa-cremate na lang siya ug dili kinahanglang dad-on-iuli pa sa Pilipinas iyahang patayng lawas.’

Panugong may sagol kahiubos-pagpangluod nga mialisngaw gikan sa kasingkasing ni Tatay Digong, kinsa taliwala sa iya kanhi panawagan nga dili pabotaran si Bongbong Marcos Jr. pagka-presidente kay sobra kahuyang nga lider, nakig-tandem hinuon si Inday ug mihatag pag todo suporta ang milyonmilyong DDS panahon sa eleksiyon nga maoy nakapadaog sa mangingilad-bakakong Marcos. Resulta?

Tanang maayong binuhatan ni PRRD, maiprastraktura man o ang pagpakunhod sa mga kasong kriminal ‘under his watch,’ gipulihag bati sa administrasiyong Marcos. Ang korapsiyon nga kanhi mihinay, karon harapharapan nang gipakita-gibinaboy sa paggasto sa House of Representatives nga pinangulohan sa kinakakorapang House Speaker Martin Romualdez, ig-agaw ni Presidente Bongbong Marcos, kinsa sige ra’g paggoryogoryong nga wala kuno siyay kalabotan sa pagkidnap-tugyan ni PRRD ngadto sa ICC, pagpa-impeach ni Inday Sara sa Kongreso ug kining walay hunong nilang paggukod sa pamilyang Duterte. Unya sa tago, siya diay ang plangka. Ngano? Tungod kay tanang buhaton sa iyang cabinet members, siya man ang moaprobar o mobasura.

Si PRRD, kinsa maoy nakapatagamtam og good governance sa katawhan mao hinuoy gipalayas, samtang ang weakest leader nga worst-governance lover mao na hinuoy mihari. Ug dili na gustong magpapuli. Dili na kaya ni PRRD nga magtan-aw sa iyang katawhan ug nasod nga gidaog-daog-giabuso-gipagutman sa administrasiyong Marcos. Busa, ingkaso mamatay siya sa Netherlands, dili na kinahanglang mopauli sa Pilipinas. Kay unsaon pa man niya sa pagpanalipod sa katawhan, kon siya patay na?