Bag-ong arsobispo

Yano lamang ang among pagsaulog sa pangilin sa Mahal nga Birhen sa Carmen ning among Parokya.

Apan nianang adlawa diay adunay kagahob sa lokal nga Simbahan sa Sugbo sanglit gitudlo ni Papa Leo XIV si Obispo Alberto Uy, DD ang kasamtangang Obispo sa Dyosesis sa Tagbilaran.

Kini tungod kay gidawat naman ang resignation letter ni Arsobispo Jose S. Palma, DD ang atong kasamtangang Arsobispo. Kining maong kalambuan naghatag og kalipay sa tanan.

Sa laing bahin, dakong pasalamat usab kang Arsobispo Palma sa iyang amahanong pagdumala ning maong lokal nga Simbahan.

Si Arsobispo Palma maoy nikumpirma kanako bisan wala mo mangutana!

Wala kaayo koy personal ug suod nga kasinatian ni Bishop Uy apan sibo sa akong nakita diha sa social media si Bishop Uy suod sa iyang mga kaparian.

Ug aktibo pud siya diha social issues ingon man sa paghatag og bili sa kalikupan. Aduna sab siyay housing projects alang sa mga kabus sa iyang dyosesis sa Tagbilaran ug uban pang mga konkretong mga lakang pastoral alang sa katawhan.

Ang simbahan ingon nga inahan kinahanglang mamahimong visible ngadto sa iyang mga anak. Wala lang siya maglihok diha sa mga hawanang Sagrado kondili atua usab sa mga dapit diin nagpuyo ang panon ni Kristo.

Salamat kaayo Arsobispo Jose Palma sa imong pagkamanggihatagon labina sa panahon sa akong dakong panginahanglan.

Dili nako hikalimtang ang imong paghatag kanako og tabang aron ang kumbento sa Mohon, Sogod kaniadto akong mapuy-an. Ug kanimo Bishop Uy, dayon sa Sugbo.