Scam City of the South na ba ang Sugbo?

Nakadawat na ba kamog tawag gikan sa kunohay banko, nga propesyonal paminawon, limpiyog tingog, pero ang tinuoray’ng tumong mao ang pagpangayog impormasyon? O natawagan na ba kamo sa dili kaila nga tawo, nga madasigong mitanyag nga magkuha kamog credit card? Basin bayag usa sa inyong mga amigo sa Facebook ang na-hack, unya gipangayoan kamog pabor?

Kining matanga sa transaksiyon dili na bag-o. Sa sinugdanan, hinay pa, apan sa pagpangaligid sa mga adlaw nagkaanam ka kusog hangtod nauso. Angay kang magbantay! Sanglit, sintomas kini sa usa ka mas dakong problema nga giatubang sa atong nasod – ang pagsulbong sa scam hubs nga nahiabot na dinhi sa ato.

Ang bag-o nga pagbuking sa usa ka langyawng YouTuber bahin sa scam call center nga naglihok sulod mismo sa Sugbo usa ka pahimangno nga delikado na ang kahimtang sa mga bank account or online account nga karon mao nay sagad gigamit sa mga online transaction.

Lalim bay, sa likod niini mao ang nagpakaaron-ingnong legitimate nga Business Process Outsourcing (BPO) offices, diin anaa nagtapok ang grupo kang kansang trabaho mao ang pagpanikas, pagpamaling og personal nga datos, nga maoy gamiton sa pagpangilad ngadto sa mga tawong ilang biktimahanon: lokal man, o internasyonal?

Ang sakit, kay kasagaran kanila, ato rang mga kaigsuonang Sugboanon. Ug kining maong balita mikaylap na sa tibuok kalibotan. Dili ba makauulaw, nga kitang Sugboanon nahimong mapagarbohon tungod kay ang Sugbo, nailado isip Queen City of the South? Apan karon, nga gilubgan na kinig mga Cebuano scammers, may ulo-liog pa kaha kitang ikapataas?

Kining nahisgotang online-scamming, posibleng gilangkoban usab sa langyawng scammers, kinsa, gamit ang gahom sa digital nga pagpangilad-pagpangawat, hasta kita mga Sugboanon, ilang giunay dinhi sa kaugalingon tang yuta.

Dili nato pasagdan nga kini magpadayon. Kinahanglan magkahiusa ang kagamhanang lokal, mga ahensiya sa balaod ug ang katawhan. Dapat, magpahigayon og regular inspection atong mga magbabalaod ngadto sa tanang BPO outlets ug i-monitor pag-ayo ilang kalihokan aron masusi: kon legit ba kini, o illegal?

Importanteng mapanalipdan ta ang kaligdong-katahom sa Sugbo nga hagbay rang gikoronahag: ‘Queen City of the South.’ Samtang dili pa kini mailisan og: ‘Scam City of the South!’