Walay plano nga magplano

Buot ni Presidente Marcos nga diyotay o wala na’y mabayran ang mga pasyente sa tambalanan ug nga mapausbaw usab ang health system sa nasud.  Apan dali usab siya miangkon nga dili pa kini mahimo karon tungod sa kakulang sa pundo.  Nagsige na lang og pangandak ang kagamhanan, gikan sa tag-P20 nga bugas ug karon kining walay bayranan sa hospital. Pulos maayo’ng plano apan wala’y pundo.  Diha untay budget sa PhilHealth apan gisuyop usab sa laing katuyoan.  Matud pa sa akong amigo, “Walay plano ang kasamtangan’g administrasyon, ug wala usab sila’y plano nga magplano.”  Fezteleern!

Walay katagbawan

Gipahibalo ni Senador Panfilo “Ping” Lacson ang publiko nga ni’ng iyang pagbalik sa senado, kuykoyon na usab niya ang isyu kabahin sa “pork barrel” diin iyang nadiskobrehan nga adunay multi-billion sa maong pundo ang gihatag sa pipila lamang ka mga magbabalaod.  Mahinumduman nga gihukman na sa Korte Suprema niadtong tuig 2013 nga ‘unconstitutional’ ang PDAF kon pork barrel apan milampos na usab sila sa pagpabalik niini sa national budget.  Walay kinutoban ang kahakog sa tawo.  Komento pa sa akong amigo, “Mas maayo pa ang iro, kay kontento na kon makatangag og usa ka bukog apan ang mga kongresista ug senador, walay katagbawan sa ilang pagkahangol.”  Muleeng!

Mobawos ang binugha

Gihandom sa Malacanang nga dili na unta daoton ni Bise Presidente Sara Duterte ang kasamtangan'g administrasyon ug nga dili usab unta niya ibandilyo sa tibuok kalibutan nga walay tumong ang pagdumala sa nasud ni Presidente Marcos, Jr.  Tungod tingale kay gilutos man sa Malacanang ang bise presidente ingon man ang tibuok banay’ng Duterte, morag natural usab nga reaksyon nga mosumbalik pagbanghag ang bise presidente ngadto sa administrasyon.  Kay matud pa bitaw sa akong apohan, “Mobawos man gani ang kahoy’ng binugha, ang tawo pa kaha.”  Madahaan!

Sila-sila na lang

Padayon gihapon ang impluwensa sa political dynasties ug makita kini diha sa bag-ong kalangkuban sa ika-20 nga kongreso diin sagad kanila mga kaliwat sa mga labing gamhanan’g dinastiya sa politika.  Gidili man unta sa konstitusyon ang political dynasty apan kay wala’y enabling law nga gihimo ang kongreso aron mapatuman kini, padayon usab ang ilang pagpahimulos.  Komento pa sa usa ka tambay, “Kay wala ma’y balaod nga nagdili sa politikal dynasty, dili gyud mahatagan og kahigayonan ang uban nga maka-pangawkaw sa pundo sa kagamhanan.  Sila-sila na lang gyud pirmi.”  Pagkatoytoy!

Bag-Ong Alyansa sa Konseho

Adunay naumol nga majority bloc sa ika-17 nga Sangguniang Panlungsod (SP) sa dakbayan sa Sugbu nga gilangkoban sa Partido KUSUG, Partido Barug ug Panaghiusa.  Apan matud pa ni Konsehal Dave Tumulak, ang natudlo nga majority floor leader, dili pormal ang maong alyansa, Dali ra kaayo nga nahikling sa mga konsehal ang ilang panagbingkil nga gihambin panahon sa kampanya.  Apan ingon ana man gyud ang politika.  Kay buot man ang majority bloc nga makabaton og Kusug, kinahanglan ang ilang Panaghiusa nga mo-Barug alang sa kalambuan ug kaayohan sa Sugbo.  Ang-aang!