Maria sa Nazaret

Basaha:  Lk. 1;26-27

Pamalandong

Sa kalibotanong kinabuhi ni Maria Santisima, makanunayon natong makita ang mga makadasig nga mga pagtulon-an gikan kaniya nga mahimong magamit nato sa atong kinabuhi.

Yano lamang si Maria. Yano siya ingon nga batan-ong dalaga sa kaliwat sa mga Judio. Yano siya ingon nga sinayoran sa panday sa Nazaret nga si Jose. Sayud si Maria sa iyang kaubos ug kakabus apan wala kini makapaluya kaniya.

Hinunoa, napuno siya sa tumang pagpasalamat gumikan sa mga grasya ug panalangin nga iyang nadawat.

Ang maong kamapasalamaton makita man diha sa iyang kaabli nga modawat ug mosunod sa Kabubut-on sa Dios alang sa iyang kaugalingon, alang sa iyang kinabuhi.

Balik-Lantaw

Matag usa kanato nakaambit sa Kayano ug kakabus ni Maria apan sa laing bahin kinahanglang moawat kita sa iyang hiyas sa pagkamapasalamaton. Bisan kinsa kanato kabus.

Ngano man? Tungod kay dili man kita ang tag-iya sa bisan unsa nga atong nahuptan, lakip na niini ang atong kinabuhi.

Apan sa laing bahin, angayan kitang moawat sa hiyas ni Maria nga mapasalamaton sanglit, ato mang natataw nga gipahimugso nga dunay tumong ug misyon.

Matag usa kanato dunay tawag nga pagahimoon segun sa latid nga buot sa Dios nga atong pagasubayon. Dili ba angayan kitang magpasalamat tungod niini?

Tungod kay gihatagan man kita sa Dios ug kahigayonan nga manginlabot sa iyang proyekto nga mao ang pagtukod sa iyang gingharian dinhi sa yuta. Ang pagtukod sa maong gingharian mahitabo lamang kun matuman nato ang Balaod sa Paghigugma.

Pangamuyo

Ginoong Jesus akong Manluluwas, itugot nga mas masabtan ko ang mga hiyas sa imong Inahan nga si Maria pinaagi sa panabang sa imong grasya. Magmanggihatagon unta ako sa akong kaugalingon taliwala sa akong mga kahuyangan ug mga kasal-anan. Amen.