Carbon Market

Nindot kaayo ang lakang ni Cebu City Vice Mayor Tomas Osmeña nga pahimoan niya’g kausaban, kon dili man mapa-revoke ang joint venture project sa Megawide ug Cebu City government kabahin sa pag-operate sa Carbon Market.

Ambot nganong giaprobahan man gyud nang joint venture project sa siyudad ug sa Megawide nga miresulta sa pagmahal sa abangan sa mga vendors nga mogamit sa mga stalls.

Nindot baya ang tinguha sa administrasyon kaniadto ni kanhi Mayor Edgardo Labella nga mao ang pag-modernize sa Carbon Market, apan daan na nga nagduda ang mga vendors nga moresulta kini sa pagsaka sa abangan kon ang Megawide na ang modumala.

Wa gyud masayop si Erwin Gok-ong, ang general manager sa Cebu Market Vendors Multi-Purpose Cooperative, nga mosaka gyud ang abangan sa mga market stalls kon ang Megawide na ang modumala sa merkado.

Sayonan ka nga sa “bodega-type” nila nga gihimo diha sa tunga-tunga nga bahin sa Freedom Park ug sa Warwick Barracks kaniadto, ang pagpaabang nila P40,000 sa upat lang ka metros kwadrado nga luna?

Unya kay daghan man ang namahawa kay alkanse man gyud, gipakubsan nila og gihimo na lang P30,000 ang buwan, pero mahal gihapon kay unsa ra gud na, mora lang og bodega ang ilang gipaabangan.

Arang-arang unta kadto kon air-conditioned pa ang building kay ang P1,000 nga abang kada adlaw, makaingon ta nga igo ra kay bugnaw man. Apan mora lang og bodega, wa gani kisame, unya mahal og abang?

Ang nakasakit pa gyud kay ang Freedom Park, dili na basta-basta nga magamit sa katawhan kay pribado na kuno ang maong lugar, ug kinahanglan ka pa nga mananghid sa Megawide. Sa laktud, wa nay Freedom ang Freedom Park.

Ang sayop sa siyudad mao nga gipangitaan ra unta nila og kwarta nga aron ang city government maoy magpatukod og building unya, pasakahan nila ang abangan apan dili sab P30,000 ang gamay kaayong pwesto.

Unta, suportahan sa mga konsehal ang tinguha ni Osmeña nga kanselahon ang Joint Venture Project tali sa Megawide. Nasayod ko nga dunay kasabotan nga dili kini sayon himoon, apan angay’ng sugdan nila kini sa pagpangita og paagi.

Sayonan ka nga ang abangan sa mga vendors diha sa merkado sa Carbon nga ang siyudad pa ang nagdumala, P1,800 ra ang buwan sa susama nga gidak-on sa gipaabangan sa Megawide og P30,000 ang buwan.

Makaingon ko nga wa gyuy ayo. Mahal ra kaayo ang P30,000 alang sa gamay kaayo nga pwesto nga katindahan sa mga vendors.