EDITORYAL — Abuso o disiplina?

Sa nanglabay nga mga adlaw, dunay nag viral nga video sa social media nga matud pa sa caption “lola gilumsan ang apo” ug miani kini og mga reaksyon sa mga netizens. Apan luyo aning maong viral video, ang apohan mipasabot sa usa ka interbyu sa usa ka lokal nga sibyaanan nga nabuhat niya kadto tungod kay napuno na siya sa kagahi’g ulo sa iyang apo. 

Usa palang ka bulan ang bata gikan sa pagkatawo niini siya nay nisagop niini kay gibiyaan kini sa inahan ug siya nay nagpadako niini.

Gusto lang gyud niya kining disiplinahon kay dili siya gusto nga masakit kay naligo diay ang bata sa baha adtong tungora.

Apan ang maong hitabo, niadto pa diay nakalabay nga bulan sa Marso ug karon lang Hulyo lang kini gi-post sa silingang nakakuha sa video. Kung unsay rason ug motibo sa silingan, iyaha na kana.

Ang maong video nakapukaw sa mga opisyales sa dakbayan ilabi na  ni Mayor Cindi Chan kinsa sa paghimo og pakisusi niini.

Subay sa balaod sa Republic Act No. 7610, o "Special Protection of Children Against Child Abuse, Exploitation and Discrimination Act” gidili ang tanang matang sa pag-abuso ug eksploytasyon sa mga bata.

Apil ani ang psychological, physical, sexual abuse, ug ang neglect  o pagpasagad sa mga ginikanan aron sila atimanon ug hatagan sa ilang panginahanglan.

Kaning balaora usahay maoy makabangga sa pagdisiplina sa mga ginikanan sa ilang mga anak. Gani gisaway pa gani kini sa uban kay lagi kuno giprotektahan ang mga kabataang badlungon.

Apan nganong duna may mokondena sa mga ginikanan nga pisikal nga makapasakit sa ilang mga badlungong anak nga ang ilaha ra man nga magtarong kini aron dili makasala sa katilingban?

Dili tanan pare-pareho og kabutang ug usa kini sa rason nganong dunay mga kabataang kuwang sa atensyon, panginahanglan, pagmahal, usahay kinahanglan sabton ang mga nagpadako nila sa pamaaging ilang nahunahunaan nga kinahanglang buhaton.

Apan dili gyud dapat maabot sa punto nga maabusohan na ang mga bata, kung unsaon, naa na kana sa mga ginikanan.