Pagsimang ni Raymond
Sa dili pa niya usbon ang istorya, mahimo bang tubagon ni kanhi Cebu City Mayor Raymond Garcia ang mosunod nga mga pangutana:
1. Hain na man ang P4.4 milyones nga BYD Tang? Kon gipaubos lang og usa ka semana nga testing sa Office of the Building Official (OBO), nganong gisalida man sa mga opisyal sa City Hall sa social media nga ilang gikabay-an ang sakyanan gikan sugod sa Pebrero hangtod sa Hunyo (nga bisan unsang kalendaryo ang basehan sa ihap niabot og upat ka buwan dili pito lang ka adlaw), gani nahibilin pang charger sa parking lot sa City Hall?
2. Kon tinuod nga giuli ngadto sa dealer niadtong Hunyo, makapakita ba siya og dokumento nga moila sa opisyal sa BYD Cebu Group ug Onglatco Auto Group nga nidawat sa sakyanan (nga mameligrong makiha og carnapping sa pagtipig sa sakyanan nga gipanag-iya na sa City Hall)?
* * *
1. Kinsa may nagparehistro sa sakyanan sa ngalan sa Cebu City Government maong naluwatan niadtong Abril og official receipt (OR) ug certificate of registration (CR) sa Land Transportation Office (LTO)? Moinsistir ba gyod siya nga amaw silang Edward Onglatco ug kaubanan nga nisugot lang nga gi-rehistro ang ilang sakyanan sa ahensiya sa gobyerno nga wala mobayad nila bisan usa ka dako?
2. Unsa may ilang sekreto (atubangan sa daghang kuwestiyonable nga mga buildings nga ilang gitugotan nga matukod) ni Cebu City Building Official Florante Catalan kansang procurement request iyang giaprobahan bisan sa lagda sa Department of Interior and Local Government (DILG) nga nagdili sa pagpalit og electric SUV para sa usa lang ka department head?
* * *
1. Kon naneguro sa legalidad sa transaksiyon, nganong giaprobahan man una niya ang procurement request niadtong Hunyo 2024 sa wala pa mokonsulta sa Cebu City Legal Office sa Hunyo 2025, nga kapin sab sa buwan human napilde sa eleksiyon sa Mayo 12 (kon nidaog pa, magtagad kaha siya sa pagsusi nasubay bang mga lagda)?
2. Nganong bisan sa pagpangampanya nga siya ang “Action Mayor” nga “Resulta ang Garantiya” ug sa nagbaha nga kuwarta sa administrasyon, napilde man sa iyang kaugalingong barangay sa Camputhaw ug sa iyang kaugalingong presinto diin namotar ang iyang mga silingan nga maoy labing nakaila niya?
* * *
- Latest
