Hiyas nakapasikat ni Elias

Kalit lang misulbong ang pangalan ni Elias TV tungod sa iyang mga kanta ug sinayawan kang kansang nagkadaiyang videos gikan sa nagkadaiya niyang fans, gipang-post sa social media.

Sa sinugdanan, giisnab ra kini nako. Kay dili para pang-‘Tawag ng Tanghalan’ iyang tingog, unya adunay sagol pagkabastos pa iyang sinayawan. Pero nganong padayon man iyang pagsulbong? Gumikan niini, nag-research ko. Ug nasayran:

Elias Lintucan diay tinuoray niyang pangalan (alyas-Elias J. TV) sa iyang mga vlog, diin didto siya magsugod pagpaila sa iyang nahuptang talento – ang pagkantag binisayang awit nga pina-reggae ang tuno ug ang hinayhinay niyang pagladlad sa unsay matang sa kinabuhi ug sa ilang panginabuhian sa bukid, Davao, Mindanao.

Pamunot og mga lubi, pagpanguhag tagok gikan sa mga rubber trees maoy sagad niyang trabaho uban sa iyang amahan. Usa ka manubo si Elias, pero graduwado sa criminology, nakaasawag guwapang maestra, diin gitugahan silag usa ka lalaking anak nga kulot kaayog buhok.

“Hingatawa si Elias, mahadlokon sa Ginoo ug may matahom kaayong kasingkasing.” Mabinationg pamahayag sa iyang misis dihang gi-interbiyu kini sa media.

Adto ta sa mga concert ni Elias. Hawan pa gani ang entablado, halos mapuno nang venue sa mga fans nga nagpaabot niya. Kon adunay nadiskitahang mga sakyanang moabot, molanog gilayon silag singgit, nagpanawag sa iyang ngalan.

Samot, kon manaog na sa van nga iyang gisakyan.

Matagbaw intawog pugong ang mga security pagpugong sa nagpanong fans nga daw mga dagkong balod, gustong mohasmag-mogakos-mohawok kaniya.

Bisag unsa ka piit, maningkamot gihapon si Elias nga makawarawara-timbaya sa iyang fans uban ang walay pagkapalong niyang pahiyom. Kon may makuyapan sa nanan-aw, mohunong siya sa pagkanta, mangayo dayog tabang gikan sa mga medics.

Timaan sa iyang pagmahal-concern kanila. Unya, kon okay na tanan. diha pa mobalik sa pagpahiyom dungan sa makahumpayng ekspresiyon: “Ouhahayyy!!!”

“Laughter is the best medicine.” Matod pa sa Reader’s Digest. Ug kini tanan anaa ni Elias. Asa ka kakitag show-konsiyerto nga gikan sa pagsugod hangtod pagkatapos, nagpunay ka lag katawa? Sa iyaha ra gayod!

Ang makatandog, kay bisan unsaon siyag away sa mga bashers o linalang nga naiinggit sa nakab-ot niyang kahabog, silang tanan iya gihapong gimahal ug gihigugma. Keep it up, Ouhahayyy!