Kinsa’y namakak?

Pwerteng sukoa ni kanhi Mayor Raymond Alvin Garcia sa pasangil nilang Mayor Nestor Archival ug Vice Mayor Tomas Osmeña nga ang siyudad sa Sugbo kuno atol sa pagdumala ni Raymond namalit og T-shirt nga tag P20,000 “kada usa” ug overpriced nga mga sakyanan.

Kabahin sa giingong tag P20,000 nga T-shirt kada usa nga matud pa gipalit sa administrasyon ni Garcia, dili ko motuo niini, kay kamahal na man pud. Kon tinuod man, makaingon ko nga husto sila si Archival ug Osmeña, pero matud ni Garcia, “bakak” ang maong report.

Na hala, naa man ang reporter nga nagsuwat sa balita nga napublikar sa usa ka online platform sa usa ka media outlet, patestigoson nato kon mopasaka og kaso si Garcia sa hukmanan.

Pero, kabahin sa mga sakyanan, gipakita man gyud nilang Archival ug Osmeña nga ang tulo ka Nissan Urvan vans gipalit kini sa Cebu City government atol sa administrasyon ni Garcia sa kantidad nga P6 million, sa ato pa, tag P2 million kada usa.

Si Osmeña nga suhito sa mga sakyanan, miingon nga pwerteng mahala sa maong pagpalit kay ang prisyo kuno sa Nissan Urban van, mokantidad ra kini og kapin sa milyon. Aw, kana angay sab nga tubagon ni kanhi mayor Garcia.

Mao na ang nakaayo kon bag-o na ang administrasyon kay maugkat man gyud ang mga tinagoan. Ang ako lang nga kinahanglan nga sa dili pa unta ipagawas ang inpormasyon ngadto sa publiko, sutaon gyud usa kon tinuod ba gyud.

Pagkabasa nako sa news report nga namalit og T-shirts ang administrasyon ni Garcia unya tag P20,000 ang kada usa, niiknat ang akong kilay uy, ug wa gyud ko motuo. Sayonan ka sa maong prisyo, unya kon mamalit og bisan 1,000 lang ka T-shirts pwerteng dakoa na sa kantidad?

* * *

Nindot unta kon himoon ni Cebu Governor Pamela Baricuatro ang pagpaninguha nga mohapsay ang mga karsada paingon sa kalungsuran. Unsaon? Did-an na ang mga tricycle nga mobiyahe sa mga national highway kay mao kini ang usa sa rason nga makamugna og traffic.

Dunay balaod nga nagdili sa mga tricyle nga mobiyahe diha sa mga national highways, apan wa kini ipatuman. Unta, mopatawag si Pam og miting sa kadagkoan sa LTO, ug Highway Patrol, apil na ang provincial director sa kapolisan aron hisgotan kining mao nga isyu.

Unya, ipatawag sab unta ni Pam ang kadagkoan sa DPWH aron masuta nganong pwerte kalangay ang pagpalapad sa mga karsada, gikan diha sa Naga paingon na sa Carcar.

Kining mga butanga wa mahimo ni Gwen kaniadto, ug unta mahatagan kini’g pagtagad ni Pam.