EDITORYAL - Panimawos SA China

Gi-ban sa People’s Republic of China si kanhi senador Francis Tolentino tungod sa iyang pagbarog sa katungod sa Pilipinas diha sa West Philippine Sea.

Ang Chinese Ministry of Foreign Affairs mianunsyo niini niadtong Hulyo 1, usa ka adlaw human napupos ang termino ni Tolentino.

Si Tolentino usa lamang sa pipila ka mga senador sa Pilipinas nga walay kahadlok nga misaway ug mibisto sa mga dautang gipangbuhat sa China diha sa West Philippine Sea.

Wala siya mahadlok pagbutyag sa mga binayrang Pilipino nga mga trolls sa China diha sa social media ilabi na sa Facebook.

Si Tolentino lang ang nibutyag diha sa hawanan sa Senado bahin usa ka public relations firm nga nagbase sa Makati City nga Infinitus Marketing Solutions Inc., nga kini gisuholan sa Chinese embassy aron mopakatap og mga fake news dinhi sa nasud aron pahumoton ang China.

Ug sa samang higayon dauton ang mga magbabalaod sa Pilipinas nga misaway China.

Siya maoy nangamahan sa duha ka maritime laws miklaro ug mipahan-ay sa maritime entitlements sa Pilipinas ubos sa international law nga nakapasuko sa China.

Ang Philippine Maritime Zones Act ug ang Philippine Archipelagic Sea Lanes Act, nga hingpit nga nahimong balaod niadtong Nobiyembre 2024 nagpalig-on sa katungod sa Pilipinas sa WPS sa international nga hawanan.

Ang China duna say kaparehas nga balaod nga nangangkon nga ilaha ang tibuok South China Sea diin nasakop ang WPS.

Apan ang kalainan lang sa ilahang balaod, sila rang mga Chinese maoy nagtuong ilaha ni. Apan wala kini ilha sa international community.

Kaniadto pa giila sa kalibutan nga ang WPS gipanagiya sa Pilipinas ubos sa United Nations Convention on the Law of the Sea (UNCLOS) nga mismo ang China mipirma og pag-uyon. Ebidensiya niini ang 2016 Arbitral Tribunal resolusyon nga gisagpa sa nawong sa China nga naghimong imbalido sa ilang pagpangangkon sa maong teritoryo ug mipalig-on sa katungod sa Pilipinas sa tibuok WPS.

Apan subo lang nga mas midaog pa ang mga pro-China candidates sa nakalabay nga eleksyon. Bisan sa mga nabuhat ni Tolentino para sa Pilipinas, wala siya suportahi sa mga Pilipino.