Apil sa listahan

Sa pipila ka diskurso ni kanhi Presedete Rodrigo Roa Duterte (PRRD) hagbay rang gianunsiyo niya nga si Presidente Bongbong Marcos Jr. (PBBM) naggumon sa gidiling drugas.

Kini tungod kay nakita niya mismo pangalan ni PBBM nga nahiapil sa listahan sa illegal drug personalites ug sa mga nangnegosiyo, nga gitunol sa taga Philippine Drugs Enforcement Agency (PDEA) niadtong mayor pa siya sa Davao City.

May giingong videos gipasalida ang usa ka sikat vlogger-influencer Maharlika Boldyakera sa social media, diin mihingos og gidiling pulbos si PBBM, kinsa nahilambigit usab sa listahan sa mga dakpunong illegal drug user nga gihuptan sa PDEA.

Usa ka ex-PDEA agent, Jonathan Morales, pagka Abril 30, 2024, mikonpirmar. Siya mismoy mipreparar ug nakahupot sa operational report. 

Sa mga gipahigayong PDEA Leaks inquiry sa Kongreso-Senado gigisa pag-ayo sa nagpungasing imbestigasyon si Morales sa mga attack dogs ni PBBM.

Diin, bisan klaro kaayo sa iyang panagway ug sinultian nga tanan niyang gitug-an pulos tinuod, siya pa hinuoy gi-cite in contempt sa mga magbabalaod kay kuno sobra kabakakon.

Namatikdan. Kon ang dagan sa imbestigasiyon mopaingon nang magtug-an sa kamatuoran, diin mahilambigit ang kapalpakan nga binuhatan sa Unang Pamilya, kalit lang putlon ang inquiry, ipadaplin ug limotlimotan na lang.

Kamandoan baya gikan sa katawhan, nga kinahanglan gyong magpa-follicle hair drug test si PBBM.

Kay siya goy drayber sa atong nasod. Anaa sa iyang mga kamot atong kinabuhi. Dapat mao kini unang gipatuman sa Kongreso ug Senado. Pero ila hinuong gilabanan-gitakpan!

Sa iyang lihok, hitsura ug sinultian, makitang morag wala na sa normal nga panghunahuna ang utok ni PBBM. Kon unsay ipangsulti, dili niya buhaton. Ug kon unsay daotang nabuhat dili maoy iyang iyawit. Timaan, aduna nay pagkabasiyo iyang ulo.

Usa ka buntag, may bata nagpaninggit sulod sa pobre nilang balay: “Bongbong bangag! Bongbong bangag!” Haskang dalia nakaduol sa amahan. Anak gibadlong.

Pero nangatarongan ang anak: “Tinuod bitaw nga bongbong bangag!” Dayong bitad sa anak sa amahan paingon sa dapit nga may gitudlo: “Tan-awa, Tay, atong bongbong, di ba, may dakong bangag?”

Na-post kini sa social media, pero dili na makita karon. Apan nagbilig mensahing bug-at: ‘Tanang butang nga banggan, kanunay gyong haw-ang!