EDITORYAL - Zoning Ordinance

Mikisi-kisi og maayo ang mga vendos sa Carbon Public Market tungod kay nabalaka sila aning gipasar nga zoning ordinance sa siyudad nga sa ilang tan-aw makawagtang sa ilang katungod isip mga nangaraan ng manindahay sa maong merkado.

Kaning zoning ordinance gipanday sa Konseho para mabahig og tarong ang mga lugar sa siyudad kung para sa komersyo, industriyal, agrikultura, o mga residential. Ang Carbon Market usa lang kini ka bahin sa siyudad diin naa sa komersyo kay naa may mga negosyo.

Sa pagkakaron, ang mga vendors lang maoy nagsige og reklamo o nipadayag og pagsupak ug kabalaka sa maong ordinansa, apan kung buot hunahunaon kining ordinansaha dili lamang para nila kondili para sa tibuok siyudad, apil ang sa kabukiran.

Pero kung buot hunahunaon, dako kini og matabang sa tanan sama residential areas, sa agrikultura, komersyal ug sa industriyal kay maklaro gyud kun unsa nga mga establisamento ang makita diha usa ka lugar.

Makatabang kini nga mamentinar ang kahapsay sa mga lugar kay magamit kini sa siyudad pag-ila sa mga dapit nga diin dili pwedeng pabutangan o pasagulan og mga negosyong dili haom nga establisamento.

Sama nalang nianang mga residential areas o ba kaha duol sa mga waterways padung sa dagat nga dili pwedeng pabutangan og mga pabrika ilabi na kun ang adunay mga hazardous chemicals o mga hazardous waste gikan ilang operasyon.

Pwede sab kini gamiton pagpreserbar sa kabukiran nga diin naa ang agrikultura aron dili magpataka og guba sa mga bukid ang mga nakapalit anang mga yutaa tungod sa malungtarong negatibong epekto niini.

Kaning zoning ordinance kung buot tan-awon og maayo, makaayo sa mas lapad nga bahin sa Cebu City, gani makaayo sab kini diha sa Carbon Public Market kay mapalambo ang lugar ug mamentinar ang kalimpyo ug kaanyag niini sa samang higayon magpabilin kining merkado publiko para sa tanan.

Pwede kining gamitong basihan sa Business Process and Licensing Office kun isyuhan ba o dili og business permit ang gustong magnegosyo kun haom ibutang ilang negosyo o dili sa napili nilang lugar.