Pagsibog

Usa sa akong nakita sa akong kaugalingon ning pag-abot nako sa midlife mao man ang kamatuoran nga dili na kaayo makapadani nako ang dinaghang panagtapok. Wala kini magpasabot nga dili ko ganahan og tawo ni dili ko buot makigharong sa presensiya sa uban apan ning maong punto nakita ko ang akong dakong panginahanglan sa pag-inusara.

Walay isulti, molihok diha sa kahilom, halayo diha sa kagahob.

Kini tungod kay buot Nakong tugkaron ang halawom nga bahin sa akong kaugalingon ug ang tumong niini.

Ang pagsibog (Retreat) nagdapit kanato ning mosunod:

1. Pagduaw sa tanaman sa atong kaugalingon. Nunot niini ang paghagpat sa mga dahon nga makadaut ug makababag sa atong paglambo.

2.  Ginamit ang maong kahilom atong himoon ang paglantaw sa unahan sa atong kinabuhi ingon man ang paglantaw sa atong kagahapon ginamit ang sukaranan ni Kristo Jesus. Nalayo ba kita kaniya?

3.  Sa maong kahilom atong pangitaon ang Dios nga maoy tinubdan sa tinud-anay nga kalinaw.

Ang kahilom nagpaila lamang sa presensiya sa Dios diha sa atong kinabuhi. Dili kini kabayran og salapi, ni gahom o kasikat.

Dili ba nga ang pagsibog usahay gikinahanglanon aron makatigom ka og igong kusog alang sa imong linain nga panaw?