Balik balikon

Usa sa mga pamaagi sa Ignatian Retreat mao man ang process of repetition diha sa mga prayer periods. Nangandoy ko nga ini’g abot sa tukmang panahon mobalik ko sa maong proseso. Ang repetition gikinahanglanon kaayo aron mas masabtan mo ang bili sa mensahe o konsepto.

Usahay diha sa daklit lamang nga pagsulti o pagpadayag niini aron ang hingtungdan makasabot ug makatugkad sa mensahe.  Nga ang maong mensahe diay  mahinungdanon gyud kaayo ug busa kinahanglang sundon ug tumanon.

Sa dihang gipangutana ni Jesus si Simon Pedro: “Simon anak ni Jonas gihigugma mo baa ko labaw sa tanan?” Katulo mitubag si Pedro gumikan sa hinungdan nga makatulo usab siya pangutan-a.  Balik-balik nga pangutana nga kinahanglang balik balikon og tubag sanglit ang atong commitment sa paghigugma sa Dios kinahanglang pahimug-atan,

Tinuod ang mga kabus dagway sa Dios dinhi sa yuta ug walay lalis niana. Apan wala usab kini magpasabot nga i-tolerate ang bisan unsang binuang. Daghan ang mangangkon nga mga kabus apan bantay salkay usab sa pamintaha ug pagpangawat.

Gikinahanglan ang disiplina mao nga balik balikon usab ang pagdumili sa ilang hangyo aron sila makaamgo nga usa ka adlaw niana sa dihang gihatagan sila og kahigayonan ug gipaklitaan og tumang pagpangga ug pag-atiman manginsulto pa ang mga kanahan.

Nga sa ato pa, makapawalay gana ug makapasagmuyo. Motabang man gihapon kita apan kini dunay bugti na nga paghago aron mamahimong mas dignified ang ilang kaugalingong pagkatawo sanglit wala man sila modawat og limpiyo.

Sa laing bahin, kining maong sentimento tingali makapapukaw sa tinguha nga masilsil ang kaayo sa Dios dinhi sa hunahuna ug pagbati natong mga tawo. Usahay matud pa mas maayo pa kuno nga mahimong maayo kay sa mahimong husto apan dili maayo. Pagkalisud tugkaron ug puy-an ang kalumo taliwala sa mga tawo nga makapasipok sa imong ulo.