Puro vs. halohalo

Bati kaayo ang kahimtang sa Pilipinas dihang si Presidente Bongbong Marcos Jr. (PBBM) nay namunoan. Kay inay iyang ipadayon ang kahayag sa kauswagan nga nasugdan-pondar na sa gipulihan niyang kanhi Pangulo Rodrigo R. Duterte (PRRD) kalit man lang niyang gipawong aron maoy mohari ang kangitngit niining iyang salawayong administrasiyon.

Subo palandungon, nga inay magtinabangay sila ni Vice President Sara ‘Inday’ Z. Duterte sa pagpadayon sa mga maanindot programa ug mga tiwasonong proyekto ni PRRD nga gidayeg sa nakabenebisyong katawhan, sumala sa unsay ilang gisaad panahon sa kampanya niadtong buhi pa ang ilang BBM-SARA Uniteam, ay pastilan, gipakuninitan hinuon niya si Inday sa iyang mga mangtas iro sa Kongreso hangtod na-impeach gyod intawon kini sa dili patas-makatarunganon nilang pamaagi.

Ang dili masabtang kinaiya sa administrasiyong Marcos mao: Nganong kutob sa may mga panghitabong kapalpakan ning iyang termino, tanang pasangil ug pagbasol adto man nila pirme ibuhos ni PRRD, nga back to civilian na man intawon kini? Nganong ang sulirang mibutho karon, diin dapat ang kasamtangang administrasiyon maoy mangitag sulbad, ipasa man hinuon ngadto sa uban?

Ang tinuoray’ng lider, kutob sa unsay sulirang matagboan sa iyang pagpangalagad, dapat siya mismo maoy moayom – ang pagpanindot sa katahom nga naguba. Ug ang pagguba sa unsay nakamaot sa katahom! Kinaiyang wala ni PBBM. Hinungdan, gisuka na siya sa kinabag-an.

Niining 2025 midterm election, nagkaatbang ang duroha ka higanteng team sa politika: ang Team-Duterte kang kansang senatorial candidates may Independte man, pero puro solid pinili ni PRRD ubos sa iyang gihuptang PDP-Laban. Ug ang Team-Marcos kang kansang 12 ka kandidatong Senador nagagikan sa nagkahalo-halong partido, diin ang kadali ra gyong magkatibulaag ug mag-iyahayg layat-biya sa barkong ilang gisakyan sa higayong moaksiyon na kinig kalunod.

Niadto lang miaging campaign rally sa Dumanjug, Cebu nga gipahigayon ni Gob. Gwen Garcia kuyog ni PBBM, si Benhur Abalos ra gyod sa Team-Marcos senatorial candidates ang diha-makita sa entablado.

Dili sama sa Team-Duterte, halos matag pangampanya anaa tanan, or kon dunay wala, mopatim-aw gyod sa dakong telon, modiskurso on-line, timaan sa pagkahiusa diha sa ilang pagkaumol. Nan, kinsa bay angay botaran:  team nga puro-usa ray bulok, o team sa nagkadaiya-halohalong bulok?

Ikaw nay hukom, botante!