Kinsay gipaminaw?

Abi ko ba og seryoso si Presidente Bongbong Marcos nga tarungon ang iyang gobiyerno hinungdan nga iyang gipangayo ang courtesy resignation sa tanang membro sa iyang cabinete.

Matud niya nga ang resulta sa miaging midterm elections diin naghanot ang mga kandidato sa administrasyon nagsilbing referendum sa iyang pamunoan.

Kini maoy hinungdan nga gipangayo niya ang courtesy resignation sa tanang sakop sa iyang cabinete.

Apan ambot kang kinsang tingog ang gipaminaw sa presidente sa iyang hukom nga ibilin tanan niyang economic managers.

Labing siguro dili ni tingog sa katawhan tungod kay kun ang publiko iyang pangutan-on siguro ko nga di sila uyon nga magpabilin si Finance Secretary Ralph Recto.

Wala pa kalimot ang mga tawo sa nahitabo sa pundo sa PhilHealth.

Dili ba si Recto ang utok sa pagbalhin sa pundo sa PhilHealth nga maoy hinungdan sa kasuko sa katawhan ug sa ubang mga mahistrado sa Korte Suprema?

Gawas ni Recto, laing angayan untang taktakon na sa pwesto mao ang giingong utok sa pagwaldas sa buhis sa katawhan pinaagi sa AKAP nga gigamit sa administrasyon pagdani sa mga botante sa miaging eleksiyon.

Kun ang mga economic managers maoy hinungdan sa padayong pag-antos sa publiko sa kamahal sa presyo sa mga palaliton, nganong sila man maoy unang gisalbar sa presidente?

Tungod sa iyang hukom makapangutana ang katawhan kun tinuod ba siyang naminaw sa tingog sa publiko.

Tataw nga gigamit lang ning paagi sa presidente aron di kaayo klaro kinsay iyang tinuod nga punterya.

Apan bisan unsaon niya pagnukos-nukos, mosiwil gyud ang motibo nga buot niyang isalikway ang mga wala makatabang sa iyang mga kandidato sa miaging piniliay.

Ug nahibawo ang tibuok nasud kinsay mga wa makadeliver.