EDITORYAL - Drug cleared barangays

Matag karon ug unya dunay mga balitang napun-an ang mga barangay sa nagkadaiyang mga siyudad ug kalungsoran sa Central Visayas nga gitawag na karon nga drug-cleared barangays.

Dunay pipila niini mga naila kaayo nga drug-infested barangays tungod kay dayag ug walay kahadlok ang mga ‘parok’ ug mga drug users nga magpa-display ra diha sa karsada nga nagbuhat sa ilang ilegal nga binuhatan.

Sa dili pa moisa ug magbiay-biay ang publiko ani, mas maayong masabtan una nila unsay rason nganong na-cleared sa drugas ang maong mga barangay.

Ang mga drug-cleared barangays wala magpasabot nga wala na gyuy manuyopay diha sa ilang dapit. Mas labaw ng wala kini magpasabot nga wala na gyuy namaligya diha og ilegal nga drugas.

Usa sa mga rekisitos ani, mao nga ang usa ka barangay adunay klarong monitoring sa mga indibidwal nga naa sa ilang drug watchlist, duna silay programa nga Community Based Drug Rehabilitation Program (CBDRP) ug dunay aftercare program para niadtong gikan sa rehab.

Gawas pa niana, daghang mga dokumento ug rekisitos nga kinahanglan nilang makompleto nga iduso nila para himoang og pakisusi ug balidasyon sa mga sakop sa Regional Oversight Committee on Barangay Drug Clearing Program (ROCBDC).

Ang ROCBDC gilangkuban sa mga law enforcement agencies sama sa Philippine Drug Enforcement Agency, Philippine National Police, LGU ug uban pa nga mohimo og balidasyon kun unsa ka tinuod ang giduso nga aplikasyon sa mga barangay aron ma-drug cleared.

 Nagpasabot kini nga dili yama-yama ang programa ug dili basta-basta makalusot ang pagpamakak kay duna may mabasihan nga mga rekord ang law enforcement agencies sa mga anti-drug operations sa maong mga nangaplay nga barangay. Ang Banat News makadaghan ng miingon nga ang kampanya kontra ilegal nga drugas dili gubat lamang tali sa mga drug personalities ug sa mga otoridad. Dunay daghang mahimo ug dako og matabang ang kooperasyon ug kolaborasyon sa mga ordinaryong residente aron magmalampuson ang pagpuhag sa problema sa ilegal nga drugas.

Kun dunay nangyam-id, siguradong sila kadtong mga nakahibalo kun kinsa ang namaligya og ilegal nga drugas ug padayong tiggamitan og ilegal nga drugas sa ilang lugar apan dili gustong magpakabana pagsumbong.