Eleksyon 2025

Ugma, Mayo 12, gipaabot nga mag-ambahan paingon sa tagsa-tagsa nila ka mga presinto ang 68.6 minilyones ka mga rehistradong botante lukop nasud.

Ug sigun sa talaan sa Commission on Elections (Comelec), ang Sugbo nagpabiling labing daghan og rehistradong botante sa tanang lalawigan sa Pilipinas---3.4 million.

Kini maoy hinungdan nga gibalik-balikan ang Sugbo sa mga kandidato pagkasenador aron sa pagdani sa mga Sugboanon.

Niining bisperas sa eleksiyon hinaot inyo na’ng nahashasan ang tanang kandidato,  labi pa sa inyong tagsa-tagsa ka mga lungsod, syudad, ug lalawigan.

Hinaut mipatigbabaw ang kaligdong, kalantip, abilidad, ug track record sa mga kandidato isip sukaranan sa inyong pagpili og mga kandidato. Hinaut dili kwarta ug way sukaranang kayugot sa mga kandidato ang mopatigbabaw sa inyong pagpili.

Nasayod kung daghan ang mga botante nga nagsunod-sunod lang unsay uso diha sa social media sa way kaugalingong pagsusi diin gikan ang ilang kayugot sa mga kandidato bisan way sala nga nabuhat ngadto nila.

Hinaot nga sa imong pagsulod sa presinto ugmang adlawa ug paghimo sa sagradong katungod pagpili sa mga tawo nga atong saligan nga mangulo sa atong gobyerno sa mosunod nga tulo ka tuig, konsensiya maoy mopatigbabaw.

Dugay kaayo ang tulo ka tuig nga pag-antos kun masayop ta pagpili sa mga tawong atong tugyanan sa kaugmaon sa atong lungsod, syudad, ug lalawigan. Ang sayop nga pagpili og kandidato bugti niini ang kalisod ug pag-antos.

Busa aron di gyud ka masayop sa mga tawo nga imong pillion, siguroa nga duna kay listahan sa mga kandidato nga imong napilian sa dili ka pa moadto sa imong presinto.

Isuwat daan ang ilang mga pangalan ug ilang numero sa balota aron mas sayon ug dali alang nimo ang pagbotar ugmang adlawa.

Ug labaw sa tanan, ayaw gyud ibaligya ang imong boto tungod kay gawas nga usa ni ka kremin, sama ra nga imong gibaligya og barato ang imong kadungganan ug ang kaugmaon sa imong mga anak ug mga apo.

Hinaot magpabiling hapsay, limpyo ug malinawon ang pinili-ay ugmang adlawa!!!