Pilia gyud ang mayo

Katapusang adlaw na gyud karon sa kampanya, kay ugma, wa na itugot ang pagpangampanya ni bisan kinsa.

Unta, ang mga botante nakapili na og mga maayong kandidato nga inyong botaran karong Lunes. Usbon nako, dili maayo nga mobotar mo nga straight sa mga kandidato sa usa ka partido.

Dunay mas maayo nga mga kandidato ang masi’g ka partido, mao nga mamili kita og haum nga tugyanan nato pagdumala sa atong kagamhanan, pilion nato ang mga kandidato nga dili mapahimuslanon sa higayon.

Mga kandidato nga makamao sa trabaho nga gusto nilang sudlan. Pananglit kon nagpapili sila pagka konsehal o kaha board member, pilia ang makamao aron nga dili sila maghilom lang sa mga sesyon.

Unya, ang Comelec dunay pahimangno sa mga botante. Medyo nipis ang balota karon, mao nga ampingi ang pagmarka sa lingin nga anaa tupad sa ngalan sa mga kandidato nga inyong botohan.

Kay kon madaghan ang tinta nga inyong mabutang, posible ni nga molapos sa likud ug kon matumong sa ubang mga ngalan didto, tabla ra nga inyo sab kadtong gibotaran.

g kon maghinubra ang gidaghanon sa minarkahan ninyo sa gidaghanon sa mga kandidato nga angay’ng pilion, dili kini iphon sa Automated Counting Machine.

Pananglit senador, 12 ra ang inyong pilion, apan kon inigmarka ninyo sa ubang kandidato ug maapil nga mamarkahan ang way labot didto sa likud kay milapos ang tinda sa marker, ug maghinubra ang mamarkahan, inbalido na ug dili kini iphon sa makina.

* * *

Ambot og tumanon ba gyud kaha sa Comelec ang ilang gipahibawo nga posibleng dili nila iproklamar nga mananaog kadtong mga kandidato nga nag-atubang og disqualification case, bisan og sila maoy makakuha og labaw’ng botos.

Kay dinhi lang sa Cebu City, si kanhi Mayor Michael Rama, si incumbent Cebu City Mayor Raymond Garcia, kanhi Mandaue City Mayor Jonas Cortes, Cebu City vice mayoral candidate Joey Daluz nag-atubang man sila og disqualification case.

Gani, si Cebu Governor Gwen Garcia gikataho sab nga pasakaan og disqualification case ug lain pang duha ka mga kaso. Bana-bana lagi nako mahitabo gyud ang dakong lantugi sa mga abogado sa Comelec ug sa mga hingtungdang kandidato.

* * *

Ang resulta sa election mahimong mahibaw-an na sa wa pay tungang gabii human sa election, kay automated counting machine man ang gamiton, ug ang mga sakop sa media duna may kopya sa election returns.

ko tingali adto gyud ko magbase sa canvassing center sa Cebu City Hall aron mapahibawo dayon nato ang publiko kon kinsa ang moguwang mananaog sa election dinhi sa dakbayan.