EDITORYAL — Kinsa may wa namolitika gud?

Nasugdan na gyud ang pagbaligya og tag P20 kada kilong bugas niadtong adlaw nga Huwebes sa 29 ka mga dapit dinhi sa Sugbu.

Daghan ang nanaway ani kay matud pa may bulok politika kay lagi hapit na ang eleksyon. Daghan ang gikwestyon kay pwede ra man diay kining buhaton sa gobiyerno nganong karon pa man.

Laing pagsaway kay matud pa gi-subsidiya kini sa gobiyerno, nagpagawas og kwarta ang gobiyerno para niini. Duna say mga nanaway kay lagum o dili kuno maayo ang kalidad sa bugas humay kay gikan kini sa National Food Authority ug labaw sa tanan, nganong pinili ra ang gitugotang makapalit.

Ang pagpalit sa gobiyerno sa maong bugas tag P33 kada kilo apan gibaligya lang og tag P20, sa ato pa alkanse na og P13. Apan gi-subsidiya kini P6.50 sa nasudnong kagamhanan ug P6.50 sab sa mga lokal nga kagamhanan.

Daghan ang nikwestyon kunohay ani, nagpaila lang nga taphaw kaayo ilang nahibaw-an aning mga programa sa gobiyerno pag-subsidiya aron mahatag ang serbisyong gikinahanglan sa katawhan.

Sa mga tambal palang diha sa mga tambalanan sa gobiyerno, gi-subsidiya na kini. Bilyones ka pesos pa.

Kana ganing Metro Rail Transit sa Manila, nag-subsidiya ang gobiyerno sa pleti ka pasahero nga moabot og P41 kada tawo aron magpadayon ang operasyon niini tungod kay kinahanglan kini nga transportasyon sa mga tawo. Nganong wala may nikwestyon ana?

Karon P13 nga subsidiya kada kilo sa bugas nga makatabang sa daghang mga kabus nga pamilya kwestyonon? Kaning tag P20 kada kilong bugas, maayo na kaayo para sa mga kabus nga pamilya. Ang napulo ka kilong P200 lang, kung commercial rice ang paliton nga tag P60 kada kilo, ang napulo P600 na. Dako kaayo ang madaginot sa mga pobreng pamilya, dili ba?

Pamolitika? Kinsa man guy wala namolitika karong panahona? Bisan kanang mga nanaway ug nikwestyon namolitika man sab. Tigpalit diay ni sila og NFA rice?

Ang importante, daghang kabus nga natabangan, total sila may magbuot ini og botar karong eleksyon.